Teigenes og Pelagia kranglar etter oppkjøp

Herøy-reiarlaget Teigenes, med brørne Sigurd og Knut Teige på eigarsida, har kjøpt alle aksjane i selskapet som har eigd dei to pelagiske anlegga i Liavåg og Florø. Denne handelen kan få eit rettsleg etterspel ettersom Pelagia har sett fram krav om forkjøpsrett til eigedomane dei har leigd for produksjon av pelagisk fisk.
- Det er opp til Sigurd Teige å avgjere om vi skal få til ei minneleg løysing eller om saka må gjennom rettsapparatet for å bli avgjort.
Slik kommenterer Egil Magne Haugstad, dagleg leiar i Pelagia, striden som har oppstått etter at Teigenes kjøpte alle aksjane i eigedomsselskapet Schombrus for 80 millionar kroner.
Transaksjonen blei gjennomført i mars månad.

Aksjelov mot løysingslov

Før salet til Teigenes besto Scombrus av 10-12 fiskeritilknytta selskap, mellom dei sunnmørsreiarlaga Strand Senior, Fiskeskjær og Kings Bay. Største eigarar var Hoddevik-familien gjennom selskapa Thonipa og Brødrene Hoddevik.
- For oss er dette førebels ei finansiell investering, seier Sigurd Teige, som med aksjelova i hand har avvist kravet om forkjøpsrett frå leigetakarane.
Teige ønskjer ikkje å gi ytterlegare kommentarar til striden med Pelagia, men viser til at kjøpet er gjort med bakgrunn i ein avtale om utleige av anlegga fram til 2022.
- Dette har ikkje noko med aksjelova å gjere, parerer Haugstad, og viser til at det er leigavtalen mellom Pelagia, og Scombrus som utleigar, som gir Pelagia rett til å kjøpe eigedomane i Liavåg og Florø i samsvar med Løysingslova.

Ute etter å kjøpe

Haugstad viser til at Pelagia over et par år har drøfta mulegheitene for å kjøpe aksjane i Scombrus. Dette vart gjort etter initiativ frå styret i Scombrus.
Mange av aksjonærane hadde gitt uttrykk for ønskje om å realisere aksjane sine, og for Pelagia vil anlegg med leigeavtalar vere vanskeleg å utvikle. Dersom Pelagia sine med planar om ei industriell og langsiktig satsing skal inkludere disse anlegga, ville opphøyr av leigeavtalene vere nødvendige, presiserer han.
Driftstida på anlegga er no nede i tretti dagar i løpet av eit år. Dette er ikkje haldbart, og Pelagia har sett på mulegheiter for jamnare og meir samanhengande drift både i Liavåg og Florø.
- Men for oss er det heilt uaktuelt å ta ei slik satsing på anlegg vi ikkje eig, understrekar Haugstad.
I staden for å akseptere tilbodet frå Pelagia, valde Scombrus-aksjonærane å selje til Teigenes som la på bordet eit høgare bod.
Haugstad seier han tek til etterretning at samtlege aksjonærar valde å selje til Teigenes.
- Men når aksjane blei selde, så følgjer det av husleigeavtalen at vi har rett til å kjøpe eigedomane. Dette har med Løysingslova å gjere, seier Haugstad og viser til at husleigeavtalen som gir Pelagia rett til å kjøpe har Sigurd Teige sjølv skrive under på både som utleigar og leigetaker i eigenskap av styreleiar i Norway Pelagic i si tid.

Frist til torsdag

Ifylgje Haugstad har Teigenes fått frist til torsdag med å godta tilbod om ei minneleg ordning som Pelagia har sett fram. Tilbodet medfører ein viss prisreduksjon i forhold til dei 80 millionane som Teigenes betalte for selskapet.
- Det er no opp til Teige å godta ei minneleg løysing. Viss ikkje må saka løysast i tråd med bestemmelsane i husleigeavtalen som inneber ei skjønsmessig vurdering av verdien på eigendomane. For oss er det rimeleg klart at marknadsverdien er lavere enn det Teige nå er tilbode, seier Haugstad.