Treårsavtale for Havila Harmony

Skipet er utleigd til selskapet Reach Subsea i tre år, med opsjon på å leige skipet i ytterlegare to år.

Havila Harmony er på veg til Las Palmas for vedlikehald og utrusting. Med denne kontrakten er alle tre subseaskipa til Havila Shipping i arbeid.
I følgje børsmeldinga vil Havila Shipping og Reach Subsea arbeide for å få så høg utnytting av skipet som råd.
Børsmeldinga opplyser ikkje kva Havila Shipping får i betaling. Adminsterande direktør Njål Sævik seier dette i ei pressemelding:
«Det er klart at jeg er fornøyd med at vi har våre mest kostbare skip på kontrakt. Selvsagt skulle vi veldig gjerne ha høyere priser på kontraktene, men slik er nå engang dagens marked. Å ha slike kostbare skip uten inntjening er svært krevende».
Til NETT NO seier Sævik at Reach Subsea har sikra oppdrag for 100 dagar for fartyet i år og at reiarlaget er garantert oppdrag for eit visst antal dagar kvart år i løpet av kontrakten. Kor mange dagar i arbeidet som er garantert er ikkje opplyst. I tillegg kjem inntektene på oppdrag Reach Subsea og Havila Shipping greier å skaffe ut over dei garanterte dagane.
- Vi har tru på at dette skal bli god butikk, seier Sævik til NETT NO.
Men trass i Havila Harmony-kontrakten og fleire avtalar om utleige av forsyningskip trur Sævik offshorereiarlaga framleis må vente på oppgangen.
«Vi har satset på trygghet for PSV-flåten fremfor å presse den siste kronen ut av hver eneste kontrakt. Vi har sett et marked de siste månedene som ikke har gitt oss mye pusterom – særlig for ankerhåndteringsskipene (AHTS). Jeg tror fortsatt at oppgangen er et stykke unna,» seier Sævik i pressemeldinga.
Havila Shipping har fire skip i opplag, tre ankerhandteringsfarty og eitt forsyningsskip. Forsyningsskipet skal seljast.