Trur på Farstad – utfordrande for Havila

Dette går fram av siste offshoreanalysen til analytiker Kim André Uggedal hos Fearnley Securities.
For å illustrere kor tøff marknaden er for offshoreselskapa, viser han til at det var over 100 fartøy som nyleg var med å konkurrere om eit langtidsoppdrag for Total i Angola.
Totalt er det no 477 fartøy i opplag, fordelt på 172 ankerhandterarar og 305 PSV-ar. I tillegg er det mange nye båtar under bygging i Kina, men her trur Uggedal at mange av prosjekta vil verte utsette eller kansellerte.

Ingen snarleg lysning

Han ser uansett føre seg ein svak marknad framover, med depressiv prising i spotmarknaden, fleire skip i opplag og gjeldsproblem som tårnar seg opp.
- I tillegg held Brasil fram med å gi hovudverk for reiarlaga, med eit stort antal internasjonale fartøy som vert blokkerte av lokalt flagga fartøy.
- Ettersom Petrobras reduserer riggflåten og leiteaktiviteten, forventar vi at fleire kontrakter vil verte terminerte.

Viktig med god balanse

Uggedal trur ei rekkje selskap vil få problem med å handtere gjelda, men meiner at selskap med god balanse vil klare seg bra. Her vert Solstad Offshore og Deep Sea Supply trekte fram som solide selskap.
Men Uggedal meiner også at Farstad Shipping har god sjans til å kome seg heilskinna gjennom nedturen, sjølv om Fearnley Securities nedgraderer selskapsratinga frå BB- til B+.
Uggedal viser til at Farstad har ein bra ordrereserve, har sterk aksjonærstøtte, har god støtte frå bankar og i tillegg har gjennomført kraftige kostnadskutt.

Få problem med første lånet

Farstad Shipping har no åtte skip i opplag, fordelt på fire ankerhandterar og fire PSV-ar. Selskapet har berre eitt nybygg i ordreboka, og har litt tid på seg før første obligasjonslåna forfell.
Det første lånet på 400 millionar kroner har forfall i første kvartal 2017, medan eit lån på ein milliard kroner har forfall i andre kvartal i 2018.
Uggedal forventar at det første lånet vil verte betalt i si heiltheit, men er meir usikker på om obligasjonseigarane må bidra når det kjem til betaling av lånet på ein milliard kroner i 2018.
- Vi ser på Farstad som eitt av dei sterkaste selskapa i sektoren, som høgst truleg vil kome seg gjennom nedturen.

Ser for seg Havila-dugnad

Meir usikkerheit knyter seg til Havila Shipping, der selskapet sin kredittrating vert redusert frå B til CCC+. Bakgrunnen er høg gearing av usikra gjeld og eit forventa utfordrande år i 2016.
Selskapet har eit obligasjonslån på ein halv milliard kroner som forfell til betaling alt i august neste år.
Uggedal ser for seg ein dugnad frå bankar og obligasjonseigarar, og utelet ikkje at det vil krevjast frisk eigenkapital.
- Vi har no fått det første eksempelet på alternativet til ei refinansiering, med konkursen til seismikkselskapet Dolphin. Dette alternativet er nok ikkje den ønskelege vegen å gå for dei usikra obligasjonseigarane til Havila.

Kan få Petrobras-problem

På den positive sida kjem at selskapet har 72 prosent kontraktsdekning på flåten i 2016 og 65 prosent i 2017, men Uggedal åtvarar mot at fire PSV-ar er på langtidskontrakt med Petrobras i Brasil.
Desse skipa står for ein betydeleg del av innteninga for selskapet, men Uggedal ser for seg ein betydeleg nedside ved at båtane vert blokkerte og kontraktene terminerte.
Farstad Shipping har ei netto gjeld på 10,5 milliardar kroner, medan Havila Shipping har ei gjeld på 5,3 milliardar kroner.

DOF-gjeld på 23 milliardar

Høgast gjeld av offshoreselskapa har derimot DOF, med heile 23,3 milliardar kroner, men her fastslår Uggedal at dette selskapet er for stort til at det kan gå galt, og reknar med støtte frå bankane og ein robust eigar.
Derimot forventar han at Siem Offshore vil verte tatt av børs ettersom Siem Industries allereie eig 83 prosent av selskapet.