Tøft år for Slettvoll-konsernet

15 færre tilsette (utan oppseiingar), krympa varelager og reforhandla husleigeavtaler er tiltak Slettvoll-konsernet har gjennomført for å kutte kostnadane og dempe verknaden av at folk kjøper færre møblar enn i rekordåret 2022. Selskapet har også forbetra innkjøpstrukturen, seier dagleg leiar Bjørn Helge Vik.

Frå eit resultat før skatt på meir enn 10 prosent av driftsinntektene i 2022, enda 2023 i minus (sjå tabell). Kostnadane auka samstundes som at inntektene krympa. Vik reknar med at mykje av kostnadsauken ikkje kan reverserast.

Inntektene er likevel godt over nivået frå før koronapandemien som kom i 2020. I 2019 hadde konsernet 293 millionar kroner i driftsinntekt.

Betre i år
I år går det betre både med sal og lønsemd, ifølgje Vik. Men eit større oppsving reknar han ikkje med før bygginga av nye bustadar tek seg opp igjen. Det skjer først når det kjem eit rentekutt, reknar han med.

Slettvollkonsernet omfattar møbelfabrikken på Stranda og 12 eigne butikkar, i tillegg til sju forhandlarar med franchiseavtale. Fleirtalet av butikkane ligg i Noreg, men Slettvoll er og i Sverige, Danmark og Spania.

Kjøpte ut franchisetakarar
I år har Slettvoll-konsernet kjøpt ut franchisetakarane i Drammen og Gøteborg og auka dermed på talet på butikkar konsernet driv sjølv til 12.

Selskapet har fire aksjonærar, Torill Slettvoll og tre familiemedlemer.

Med Toril Slettvoll som eigar satsa selskapet på å bygge opp ei eiga kjede av butikkar og produsere for den.