Usikkerheit kring andre byggetrinn

Lakseoppdrettarane i Atlantic Sapphire møter nye utfordringar på vegen til å produsere meir enn 200.000 tonn laks årleg innan 2030.

Det kjem fram i den månadlege rapporten for mai som blei sendt ut i ei børsmelding torsdag.

Har investert 650 millionar til no
Selskapet som blei starta for 12 år sidan av Johan Andreassen og Bjørn-Vegard Løvik frå Vestnes, er i full gang med byggetrinn to av det landbaserte oppdrettsanlegget deira i Florida i USA.

Til no er det investert kring 650 millionar kroner.

I rapporten melder selskapet at dei i løpet av dei siste vekene har opplevd meir usikkerheit, som følgje av auka leveringstider, knappheit og auka kostnader.

Treng meir tid til å få oversikt
I rapporten påpeiker Atlantic Sapphire at dei jobbar med å minimere forseinkingane som følgje av påverknad frå globale leverendørkjeder og situasjonen for byggeprosjektet.

Selskapet påpeiker at dei treng meir tid til å få oversikt, men at dei ventar å skyve på noko av dei venta inntektene i 2022, til neste år.

Ventar mindre slaktevolum i juni
I rapporten kjem det samtidig fram at laksen har auka veksten i tråd med forventingane, og at dei opplever lite sjukdom.

Selskapet slakta kring 140 tonn laks i mai – 20 tonn meir enn månaden før. I juni ventar dei lågare slaktevolum fordi dei skal installerast ei ny fileteringslinje.

Når byggetrinn to står ferdig, ventar selskapet ein årleg produksjon på 25.000 tonn.

Nedtur på børs i år
Aksjeverdien til Atlantic Sapphire har svinga mykje i løpet av det siste året, etter utfordringar med høg dødelegheit og brann ved anlegget i Danmark.

Så langt i år har aksjen falle med meir enn 40 prosent, og børsen prisetter no selskapet til 2,25 milliardar kroner.

Kursen slutta torsdag på 24,80 kroner, før månadsrapporten for mai blei sendt ut.