Vekst og finanssmell for Intership

Hareid-reiarlaget sitt siste år som sjølvstendig reiarlag enda med eit stort hopp i inntektene – og finanskostnadene. Det gjorde at overskotet vart redusert til ein tidel samanlikna med 2022-resultatet.

Det viser konserntala for Intership-selskapet for 2023.

Inntektene steig med drygt 100 millionar og enda knappe 388 millionar. Det er ny rekord med god margin.

Valutatap og rentekostnader tynga
Driftsresultatet var solide 130 millionar, men finanstap på 126 millionar, gjorde at resultat før skatt enda på 4,1 millionar (sjå tabell under).

I årsmeldinga for konsernselskapet Hadar Holding viser styret til valutatap og auka rentekostnader som årsak til resultatet.

Veksten i aktivitet førte óg til ny auke i arbeidsstokken for Hareid-reiarlaget. Ved utgangen av 2023 var dei 155 tilsette, ei auke på 18 frå året før.

Har gått saman med Aquaship
Intership-reiarlaget blei mot slutten av fjoråret samde om å slå seg saman med Aquaship som har base i Kristiansund.

Tidlegare i år blei det klart at Intership-grunnleggjar Ole-Peter Brandal blir ny toppsjef for det sammenslåtte brønnbåtselskapet som har nær 40 fartøy i flåten.

Ved utgangen av 2023 hadde Intership ni brønnbåtar i flåten. I år har samarbeidsreiarlaget kjøpt ein 2021-bygd båt frå Nordlaks, og har til saman tre båtar i bestilling hos verft i Tyrkia og Spania. Ifølgje årsmeldinga er det også gjort avtale om kjøp av eit fartøy til med levering i 2024.

«Mismatch» i marknaden
I årsmeldinga påpeiker styret at det er manko på brønnbåtar i marknaden, og ein «mismatch» mellom kva type båtar oppdretterane har behov for, og kva båtar som er tilgjengeleg.

Dei ventar at situasjonen vil normalisere seg ettersom det kjem nye båtar inn i marknaden, men at dette vil ta fleire år.

Intership vart starta i 2014 av gründerane Ole-Peter Brandal, Håvard Johannes Grøntvedt og Kjetil Opshaug. Dei tre var framleis aksjonærar ved Aquaship-samanslåinga, men det britiske investeringsfondet Aso Lux har dei siste åra hatt nær 95 prosent av aksjane.