Vil byggje cruiseferjer ved norsk verft

Det Nice-baserte selskapet Nice Green Ferries opplyser på Linkedin at selskapet har signert ein LoI (Letter of intent, red merk) med ei norsk verftsgruppe for bygging av to 140 meter lange Ropax cruiseferjer.

Dei to ferjene skal gå daglege turar mellom Nice, Korsika og Sardinia.

Kvar ferje skal kunne ta 1.200 passasjerar og 400 bilar.

Nice Green Ferries opplyser ikkje kva for eit norsk verft som er tiltenkt å få oppdraget, men både Maritimt Magasin og Ferry Shipping News har tidlegare opplyst at det er snakk om Fosen Yards i Trøndelag.

Nice Green Ferries er ein del av Oslo-baserte Green Ships, som Per Kavli står bak.

Hydrogen + batteri
Nice Green Ferries opplyser på si heimeside at målet med satsinga er å byggje opp ein flåte som er utsleppsfrie, og som kan operere ut frå Nice og i Middelhavet.

Dei to ferjene som selskapet har skrive intensjonsavtale på får hybrid framdrift basert i hovudsak på hydrogen og batteri.

Om planen vert sett ut i livet, er det meininga å starte opp ruta hausten 2023.

Opsjon på cruiseskip
Selskapet opplyser at ein i tillegg har opsjonar på bygging av to små cruiseskip for 600 passasjerar, med lugarar på rundt 37 kvdratmeter, i tillegg til balkong.

Etter planen skal desse to cruiseskipa også ha Nice som heimehamn, men segle til mindre hamner langs Middelhavet, som til dømes Venezia og Ajaccio.

Mange vil få nei
Selskapet viser til at ein forventar at dei store cruiseskipa på 200 meter eller meir, og som ikkje er utsleppsfrie, ikkje vil få løyve til å gå til fleire av dei store cruisehamnene i framtida, grunna strenge utsleppsrestriksjonar.

Dei to cruiseskipa er forventa å starte seglinga frå andre halvdel av 2024.

Nice Green Ferries opplyser at ein om kort tid vil inngå avtalar med ei rekkje selskap rundt hydrogentilførsle, hamneservice og sals- og marknadsarbeid.