Prisvekst gav sjømatrekord

NPK-NTB: Hovudgrunnen til rekorden er prisveksten, ifølgje Noregs sjømatråd.

Eksportverdien har auka med 2,4 milliardar kroner samanlikna med januar i fjor, skriv Noregs sjømatråd i ei pressemelding.

– Sjømateksporten for januar følgjer den sterke trenden vi har sett dei siste 17 månadene, med månadleg sjømateksport på over 10 milliardar kroner, seier administrerande direktør Christian Chramer i bransjeorganisasjonen Noregs sjømatråd i ei pressemelding.

Vidare skriv Norges sjømatråd at hovudgrunnen til auken er prisvekst.

–Trass i lågare eksportvolum av laks, torsk, aure og hyse, bidrog auka eksportvolum av sei og sild til auken i eksportverdien. Ei svakare norsk krone har også bidrege til rekorden, seier Chramer.

For første gong sidan april 1989 er USA den største marknaden for norsk sjømateksport, målt i verdi. Noreg eksporterte sjømat til USA for 1,15 milliardar kroner i januar, og dermed har verdien av eksporten auka med 41 prosent frå januar i fjor.

Samtidig var volumet som vart eksportert til USA, fire prosent lågare i januar i år enn i januar i fjor.

Noregs sjømatråd opplyser at etterspurnaden etter norsk laks i USA har auka betydeleg over tid.

I januar vart det eksportert sjømat til 116 land.

Utanom USA, var Danmark og Polen dei største marknadene for norsk sjømat målt i verdi.