– Den beste sommaren nokonsinne

Etter fleire år med koronapandemi og ei verksemd med berg- og dalbanesvingingar i aktiviteten, har det vore fullt køyr for Uteguiden i sommar.

Tur- og aktivitetsselskapet som Oscar Almgren starta i 2008, har lagt bak seg «den beste sommaren nokonsinne», er den gledelege beskjeden frå svensken som er største eigar og dagleg leiar.

– Vi dobla omsetninga i mai og juni, samanlikna med førre året, og vi har vore godt over i både juli og august, oppsummerer Almgren sesongen.

Han legg ikkje skjul på at det er godt etter nokre år med intens jobbing under pandemien.

– Det er fint å vere tilbake til meir stabilitet og iallfall ei meir form av å vere normalt, seier Almgren.

Nytt underskot i fjor
2021-rekneskapen for Uteguiden As som no er offentleg, viser at aktiviteten var på veg opp, etter eit botnår i 2020. Samanlikna med «koronaåret» 2020 blei omsetninga dobla.

På botnlinja vart det nok eit år med underskot i 2021, men langt mindre enn i 2020. (sjå tabell under).

I tillegg til turaktivitetar, består Uteguiden-konsernet av eit Surdeigsbakeri og kafe i Stranda sentrum.

Dei siste åra har også Erlend Hjelme og Erlend Ringstad kome inn på eigarsida, saman med Oscar Almgren.

Amerikanske turistar er viktig gruppe

Sjølv om det i år har vore ein del færre nordmenn på tur i år, har dette i stor grad blitt erstatta av besøk frå utlandet. Amerikanske turistar utgjer ein av dei viktigaste kundegruppene for Uteguiden.

– Det er ei kjøpesterk gruppe som har kultur for å bruke guide på tur. Dei vil gjerne dra på tur over fleire dagar og bookar gjerne i god tid, fortel Almgren.

Turselskapet har óg mange skandinaviske reisande og turistar frå Mellom-Europa, som Benelux-landa.

Almgren påpeiker at det er turoperatørane dei har samarbeida med over fleire år, som sørger for å «levere» reisande.

(saka held fram under)

Fleire enn 20 guider i jobb
Då Uteguiden starta opp var vinteren høgsesong med klart størst aktivitet. I sommar har dei hatt heile ti guider i arbeid både på Valldal og i Ålesund, i tillegg til tre på Stranda.

– Den største utfordringa i sommar har vore å få tak på nok folk og utstyr, fortel Almgren.

Utlendingane bryr seg også generelt mindre om dårleg vêr, kan Uteguiden-sjefen stadfeste.

– Det kulaste er kanskje at vi har klart å levere med det veret vi har hatt på Sunnmøre. Det jo vore 14 grader og regn i heile sommar, utbryter Almgren.

Kajakkpadling superpopulært
Kajakkpadling er mellom aktivitetane med størst auke – på fleire hundre prosent. Færre har vore på rafting i Valldalen i sommar.

Landevegssykling er ein anna aktivitet som er blitt meir populær. Då dei skulle kjøpe inn nye syklar, valde dei det det norske Fara-merket, som Almgren veit leverer «dei kulaste syklane» - og kvalitet.

Kvalitet er framleis eit stikkord for verksemda svensken held på med.

– Eg trur det vil vere viktig framover å halde fram med å levere kvalitet, og ikkje gå i fella med å ta billege løysingar.