Volda Mat-sjefen: – Absolutt godt rusta for framtida

Volda Mat la bak seg eit nytt år med nedgang i inntektene i fjor. At pilane har halde fram å peika ned etter rekordåret 2021, uroar likevel ikkje dagleg leiar og eigar Hege Skurtveit.

– Slik er det i denne bransjen, det svingar veldig etter kva kundeavtaler ein har. Vi har hatt nokre år med gode avtaler, som vi ikkje hadde i fjor, og som vi ikkje har i år. Då går salet ned, fortel ho til Nett No.

– Trur det vil løne seg på sikt
– Vi kan sjå tilbake på nokre gode år. Pandemien påvirka salet vårt i positiv retning, samtidig fekk vi ei kortsiktig landsdekkande avtale med Norgesgruppen på fiskepudding, fortel Skurtveit.

Samtidig hadde dei i fjor ei unormal høg prisauke på råvarekostnadane, der dei valte å ta ned marginane.

Skurtveit fortel at dei har gjort fleire val som gjer at ho er trygg på at pilane vil peike oppover att for den tradisjonsrike bedrifta med meir enn 80 år i bransjen

– Vi har gjort om på grossisavtalen vår og knytt oss til ein ny samarbeidspartnar. At omsetninga går ned er difor venta, men vi trur det vil løne seg på sikt, fortel ho.

Har gjort betydelege investeringar
Dei siste åra har Volda Mat også gjort store investeringar. Skurtveit ramsar opp ny hurtighakkar for fiskematfarse, nye kjølarar og fleire andre maskinar som er kome inn i produksjonen.

– Så mykje utstyr som vi har kjøpt dei siste tre åra, har vi ikkje gjort sidan vi flytta frå Volda til Furene i 1978, seier Skurtveit.

Det høyrer med til historia at dei også sette opp eit nytt bygg i 2014 og totalrenoverte den gamle fabrikken i 2018.

– Vi er absolutt godt rusta for framtida, og har vore flinke til å fornye oss. Det må vi også gjere om vi skal henge med i denne bransjen, seier Skurtveit.

Nedgang i omsetning og lønnsemd
Omsetninga i 2023 stoppa på drygt 18 millionar – eit par millionar ned frå året før. Også marginane blei knappare og overskotet før skatt sank frå 3,2 til snaue 2 millionar.

Hege Skurtveit er tredje generasjon eigar og drivar i selskapet, som feira 80-årsjubileum i 2022. Matprodusenten hadde ein eigenkapital på 6,1 millionar og ei langsiktig gjeld på 7,6 millionar kroner.

Tidlegare heitte selskapet Volda Fiskemat, men skifta namn mellom anna på grunn av at selskapet satsar også på annan mat enn fiskemat, med potetball som det viktigaste produktet.