Havila taper framleis på hotell

Havila Holding i Herøy har dei siste åra investert i tre hotell - i Ørsta, på Grodås og i Geiranger.

I fjor spådde Havila Hotels-direktør Günther Dahler «solskinnstal» for hotella deira i 2023. Slik vart det ikkje.

Drifta ved alle dei tre hotella til konsernet gjekk med underskot i fjor.

Tapt eigenkapital og høg gjeld
Dei tre driftsselskapa for hotella hadde i fjor eit underskot på kring 7,5 millionar kroner. Tala kjem fram i årsmeldinga til eigarselskapet Havila Hotels.

I årsmeldinga kjem det også fram at eigenkapitalen er tapt for Havila Hotels og alle driftselskapa. I Havila Hotels er det bokført minus 9,2 millionar i eigenkapital og ei langsiktig gjeld på drygt 95 millionar kroner.

Samla pluss i Geiranger - minus i Ørsta og på Grodås
Medan driftsselskapa til Havila-hotella slit med lønnsemda, er det i hovudsak motsett for eigedomsselskapa.

Medrekna desse resultata, ser økonomien difor lysare ut.

Samla gjekk dei fire eigedomsselskapa under Havila Hotels-paraplyen med eit overskot før skatt på 6,4 millionar. Eigedomselskapet Geiranger Fjord Hotels As dreg mest opp.

Samla for både drift- og eigedomsselskap, gjekk Geiranger-hotellet i pluss, medan det vart underskot i Ørsta og på Grodås.

Har musklar trass betydelege tap
Trass dei økonomiske utfordringane blir det vurdert at den reelle egenkapitala i selskapa er forsvarleg ut frå risiko og omgang, heiter det i årsmeldinga til Havila Hotels.

Det blir også understreka at kreditorane stiller seg bak føresetnaden om framleis drift.

Trass nokre år med betydelege tap, har Havila Holding-konsernet musklar til nye investeringar etter salet av Fjord1-aksjane. Per Sævik fortalde til Nett No i vår at konsernet gjerne satsa meir på reiseliv.

Omsetningsrekord – og auka underskot
Ved Havila Hotel Ivar Aasen i Ørsta sette dei ny omsetningsrekord frå drifta i fjor.

Ørsta-hotellet fekk ein koronadupp i 2020 og 2021, etter å ha hatt inntekter på i underkant av 20 millionar årleg. I 2022 og 2023 peika omsetninga oppover att – og enda i fjor på drygt 24 millionar.

Samtidig blei underskotet kraftig forverra for driftsselskapet, frå minus 1,2 millionar i 2022, til minus 3,2 millionar i fjor.

I rekneskapen blir det påpeika at eigenkapitalen er tapt, men at eigarane stiller seg bak føresetnaden om framleis drift. Det er venta at selskapet som sysselsette 17 årsverk i fjor, vil ha framtidig inntening, heiter det i årsmeldinga.

Hopp i inntektene på Grodås
Havila Hotel Raftevold fekk også eit nytt hopp i omsetninga frå drifta til nær 8 millionar. Det er om lag ei dobling frå dei siste åra.

Hotellet har likevel litt opp til nivået før koronapandemien, då dei årlege inntektene låg på 12 til 14 millionar.

Også Grodås-hotellet fekk eit nytt minusresultat på to millionar i fjor. Det er samtidig det lågaste underskotet sidan 2018 for driftsselskapet som hadde seks årsverk i arbeid i fjor.

I rekneskapen blir det understreka at eigenkapitalen er tapt.

Årsrekneskapen for Geiranger Hotelldrift As, Geiranger Fjord Hotels As, Raftevold Hotel Eigedom As og Eiendom Hornindal As er ikkje offentlege frå Brønnøysund.

Nett No har ikkje fått kontakt med Havila Hotels-direktør Günther Dahler for ein kommentar til saka.

Dahler har kommentert resultatet for Ivar Aasen-hotellet i Ørsta til Møre-Nytt. Han fortel at dei har gjort fleire investeringar og at det for deira del i stor grad handlar om å kome tilbake etter pandemien.