Dekkhotell konkurs med milliongjeld

Ålesund Dekk og Dekkhotell har meldt oppbod og Møre og Romsdal tingrett har opna konkurs i selskapet. I retten opplyste firmaet at dei skulda nær 1,4 millionar kroner, ifølgje ordskurden – avgjerda i tingretten.

Underskot og innstilt verksemd
Firmaet som blei starta i 2018 hadde ei samla omsetning på nær 3,9 millionar kroner i oppstartsåret og 2019. Rekneskapane frå begge åra viser eit underskott.

I retten blei det også opplyst at verksemda var innstilt og at det for tida ikkje var tilsette i selskapet. Første skiftesamling er 16. august og bustyrar i saka er advokat Mari Vik-Slettvoll.

Slutt for musikkselskap
Den siste veka har også fire musikkproduksjonsselskap i Ålesund meldt oppbod. Same eigar står bak selskapa Starbox Holding, Starbox Publishing, Starbox Recordings og Starbox Music.

Berre sistnemnte har hatt omsetning å vise til dei siste åra. Siste offentlege rekneskap frå 2018 viser ei årsinntekt på nær 2,9 millionar og eit underskot på drygt 600.000.

Skuldnaren opplyste i retten at den samla gjelda er på 61.000 kroner, ifølgje ordskurden.

Færre konkursar i Møre og Romsdal
Så langt i år viser kunngjeringane frå Brønnøysundregistera, at det framleis har vore betydeleg færre konkursar i år, samanlikna med 2020.

Det har vore 67 konkursopningar og ni tvangsavviklingar i Møre og Romsdal.

(sjå alle konkursane i eksterne lenker).

I fjor var det registrert 84 konkursopningar og to tvangsavviklingar på same tid i fylket. Fjoråret var også eit år der konkurstala gjekk bratt ned fordi styresmaktene let vere å forfølgje krav etter at koronapandemien slo til.

Også færre i Nordfjord
I Nordfjord er det så langt i år opna konkurs i eit selskap i Stad og Gloppen, to i Stryn og seks i Kinn – til saman 10 saker.

I fjor på denne tida var det registrert 15 konkursar i desse Nordfjord-kommunane, inkludert tre Ricco Vero-selskap i Stryn.