– Dette var svært gode nyheiter

– Dette var svært gode nyheiter, seier Svein Flølo som leiar forretningsutviklinga i Hofseth International, på vedtaket til fylkespolitikarane måndag.

Fylkesutvalet gjekk måndag inn for å trekke protestane både i høve vasskvalitet og verdsarv, som tidlegare har vore mot Hofseth International sine planar om eit landbasert oppdrettsanlegg i Storfjorden.

– Vi er veldig glade for dette vedtaket, som truleg vil lette den vidare prosessen, seier han.

Statsforvaltaren protesterer framleis
I løpet av den siste veka har det kome fram at statsforvaltaren og fylkesadministrasjonen har trekt nokre av sine fråsegn mot anlegget i Raudbergvika.

Men statsforvaltaren protesterer framleis på korleis oppdrettsanlegget inne i fjellet vil påverke forholdet til verdsarvområdet.

Flølo meiner vedtaket i fylkesutvalet svarar ut noko av det statsforvaltaren har protestert mot.

– Har trua på at dette skal gå vegen
I vedtaket frå fylkesutvalet blir det understreka at Raudbergvika blei halde utanfor verdsarvområdet då søknaden om dette blei sendt – nettopp fordi det framleis skulle vere regulert til næringsområde.

Politikarane viser også til at det skal vere høgare terskel for å seie nei til tiltak av vesentleg samfunnsnytte – og at dei negative sidene ved tiltaket er «særs begrensa» samanlikna med dei positive.

– Vi har trua på at dette skal gå vegen og har tenkt til å bygge dette anlegget, seier Flølo til om vegen vidare.

Fjord-ordførar trur på løysing
Fjord-ordføraren har gått ut og gitt uttrykk for at ho er skuffa over protestane frå statsforvaltaren.

– Vi er samd med ordføraren som meiner at statsforvaltaren i for liten grad tek omsyn til den næringsutviklinga som slike bygdesamfunn er avhengige av, seier Flølo.

Kommunen meiner likevel er det mogleg å kome i mål med reguleringsplanen, og bur seg på mekling hos statsforvaltaren om saka.

– For oss er dette uansett eit skritt i rett retning. Det er også viktig å påpeike at dette er planar om ei trinnvis utbygging, der ein mellom anna vil kunne følgje utviklinga av utslepp undervegs, påpeiker Flølo.