Fekk tre råd om grøn omstilling av Nordsjøen

(NPK- Peder Skjelten): I ein debatt om korleis Nordsjøen kunne bli plattform for grøn omstilling blei medlemskap eller nærleik til EU diskutert: – Avsporing, meiner Senterpartiet.

Under Arendalsveka presenterte NTNU og Sintef tre råd til politikarane for å få gjennomført ei grøn omstilling av Nordsjøen.

Dei tre råda var:

1. Sørgje for berekraftig utbygging av Nordsjøområdet
2. Legge til rette for CO2-lagring tilsvarande hundrevis av «Langskip-prosjekt» innan 2050
3. Halde oppe kunnskappsforspranget Noreg har på resten av verda

Råda kjem frå ein kunnskapsoppsummering frå fire forskingssenter: LowEmission, FME, NCCS, FME NTRANS og FME NorthWind.

Kunnskapsoppsummeringa har sett på kva moglegheiter for nye klimateknologi og arbeidsplassar Nordsjøen kan gi innan blant anna C02-lagring, elektrifisering av sokkel, nordsjønett, havvind, energiøyer, hydrogen og meir.

Kundar og marknad
Fleire frå næringslivet var til stades på debatten. Her dukka behovet for å knytte seg nærmare EU.

Arvid Moss ved Hydro Energi sa det er viktig for Noreg å vere god på alle delar av dekarbonisering. Tre k-ar var sentrale i det: Kompetanse, Kapital og Kundar. Med kundar meinte han EU.

– Vi kan ikkje berre sette i gang prosjekta, vi må ha kundar og marknadar som vil betale for det, sa Moss.

Vil tettare på for å få kundar
Også Hildegunn Blindheim, direktør for klima og miljø hos Norsk olje og gass, meinte det var unionen vi måtte bli nærmare.

– Vi må vere mykje meir til stades i EU for å få kundar til fornybar norsk energi.

Venstre gjekk i fjor inn for at Noreg burde inn i EU. Ola Elvestuen (V) deltok i debatten for partiet og støtta næringslivet i å knytte seg til EU.

– Vi må gjere meir for at det skal kome etterspurnad etter Hydrogen. For å gjere det, må vi bli med i EU eller bruke EØS-avtalen for det den er verd, sa Elvestuen (V).

Sp: – Avsporing
Senterpartiet har vore klare på at dei ikkje ønsker å bli ein del av EU, og vil helst sjå Noreg trekke seg ut av EØS-avtalen. Sandra Borch var til stades på debatten for Senterpartiet. Ho meiner det blir feil å diskutere EU-medlemskap i ein debatt om grøn omstilling av Nordsjøen.

– Det er ei avsporing. Vi kan ta politiske val om å samarbeide med land i EU om ei grøn omstilling og skaffe oss ein marknad der, utan å bli medlem, seier Sandra Borch i Senterpartiet til Nynorsk pressekontor.

(©NPK)