Har sikra storkontrakt på prestisjeprosjekt

Prodtex skal levere to to havbotnar i stål til eit stort testbasseng ved Norsk Havteknologisenter i Trondheim, ifølgje ei pressemelding.

Kontrakten er inngått med Axtech i Molde og det er store dimensjonar over oppdraget. Til saman vil det bli nytta meir enn 700 tonn stål i oppdraget som skal leverast i 2026.

Verdien på kontrakten blir ikkje opplyst, men administrerande direktør Sigbjørn Nordstrand i Prodtex fortel at det dreiar seg om ein av dei største selskapet har sikra seg.

– Det kan bli snakk om eit tresifra antall millionar, seier han til NETT NO.

– Er berre starten
Prodtex-sjefen fortel at det er eit «svært spanande» prosjekt. Det er sett høge toleransekrav, som gjer at oppdraget er ekstra utfordrande for Vanylven-bedrifta.

Nordstrand seier han er imponert over kunnskapen hos Axtech og at han ser fram til å samarbeide meir med Molde-selskapet.

Prosjektleiar Erik Aspen i Axtech meiner på si side at Prodtex er dei einaste i verda som kan levere havbotnane med den presisjonen som krevst.

– Dette havlaboratoriet skal ikkje vere noko mindre enn «state of the art». Denne ordra til Prodtex er berre starten på fleire og vi gler oss til vidare samarbeid, uttaler han i meldinga.

Skal teste skip og konstruksjonar
Havbassenget er eit stort laboratorium der ein utfører testar av faste og flytande konstruksjonar under realistiske simulerte forhold med bølgjer, straum og vind.

Bassenget skal mellom anna nyttast til å teste skip, vindturbinar, oppdrettsanlegg, bruer og offshore konstruksjonar.

Havbotnane skal mellom anna kunne justerast til ulike testdjupne frå kontrollrommet med millimeterpresisjon.

 Statsbygg er byggherre for heile senteret. NTNU skal eige og drifte havteknologisenteret på vegne av staten. SINTEF Ocean blir ein viktig operatør og leigetakar.