Heider til Ulmatec-konsernet

Ulmatec-konsernet (Ulstein Marine Technology) med hovudkontor i Ulsteinvik er tildelt Nærings-Drivkraft-prisen frå Sparebanken 1 Søre Sunnmøre.

Prisen blei delt ut under ein seanse i administrasjonsbygget til Ulmatec Handling Systems på Hareid torsdag.

– Dei har bygd stein på stein, og gjennom stadige oppkjøp og utvikling gjennom dei siste 21 åra, står Ulstein Marine Technology-konsernet fram som eit særs kompetent, veldrevet og solid konsern, påpeika banksjef Sigrun Heltne Vartdal for næringsliv.

Ho fortalde at prisen ikkje vart delt ut kvart år, men når dei hadde ein god kandidat. Sist den blei delt ut var i 2019, til kjolesuksessen Ko&Ko i Herøy.

Oppstod i kjølvatnet av Vickers-sal
Vartdal trekte fram korleis konsernet oppstod etter salet av Ulstein-gruppen til Vickers. Kapitalen blei investert att i lokalsamfunnet.

– Det genererte store verdiar til lokale eigarar i Ulsteinvik, som med ein gong blei investert tilbake i lokalsamfunnet, sa Vartdal.

Konsernet er både ei lokal drivkraft, samtidig som dei lagar produkt som har heile verda som marknad, la ho til.

(saka held fram under)

– Har vist stayerevne og lukkast
Banksjef Stig Brautset Sparebank 1 Søre Sunnmøre trekte fram korleis eigarane har bygd noko nytt på den erfaringa og kapitalen som dei fekk ved salet.

– Å bli ein internasjonal leiande aktør på det maritime området, står det stor respekt av, påpeika han.

Sjølv om han trur mange kan ha blitt freista til å gi opp når det har vore motbakkar, har Ulmatec-eigarane «har vist stayerevne og lukkast over tid med heile forretningskonseptet», la Brautaset.

– Ikkje gjort over natta
Styreleiar og direktør for forretningsutvikling, Håvard Myrene, saman med konsernsjef og eigar, Stig Ulstein, tok i mot prisen på vegner av bedrifta.

– Å bygge industri er ikkje gjort over natta. Det er eit langdistanseløp med titusenmeter på titusenmeter. Du kan alltid ta ein sprint innimellom, for å nå noko, men ein må halde fram - også må ein tole motvind, sa Myrene om kva perspektiv dei har hatt.

Eigar Stig Ulstein påpeikar at vegen med å bygge opp produksjonsanlegg og satse så vidt som Ulmatec har gjort, er ekstra krevjande. Han fortel at dei vil halde på filosofien med å ha «autonome» selskap.

– Du kan ikkje sitte med ein stor konsernadministrasjon som skal detaljregulere alle andre. Kvar enkelt bedrift må vere sjølvgåande, legg han til.

Ein styrke å drive variert
I dag teller konsernet sju selskap med ei omsetning på nær ein halv milliard årleg og kring 200 tilsette.

Styreleiar Myrene meiner det er ei styrke at bedriftene deira har ulike fagmiljø som kan ha dialog på tvers av ulike marknader. Samtidig gir det ein balanse i økonomien, om nokre marknaden opplever nedgangstider.

– Bedriftene jobbar i ulike marknader, som er oppe og nede til ulike tider. I sum så byggar det konsernet sterkare. Samtidig må ein heile tida ligge i front på dei områda ein jobbar med, la Myrene til.

Styrer mot omsetningsrekord
NETT NO besøkte bedrifta førre veke då fiskeri- og havminister Bjørnar Skjæran kom for å hauste innspel til ein ny maritim politikk.

Då kunne Iver Bjørnereim fortelje at koronaduppen var historie, og at konsernet styrte mot ny omsetningsrekord for 2021. Myrene kunne torsdag forsikre at det også blir overskott, utan at han vil gå ut med tal no.

Vindkraftmarknaden blir eit satsingsområde for konsernet framover, ikkje minst avansert gangvegar som kan nyttast til å overføre folk til og frå båtar, vindturbinar – og andre maritime installasjonar.