Håpar Tom Cruise-pølse vil lokke turistar til bygda

(NPK): På Hellesylt på Sunnmøre førebur dei seg på turistsesongen og planlegg å lokke turistar med Tom Cruise-pølser og motorsykkelvrak.

– Det skal vere ei saftig, kjøttfull pølse. Og så skal det vere spesielle urter og krydder som finst naturleg i området her, seier Ole Ringdal til NRK.

Den lokale kjøttprodusenten håpar pølsa, som dei kallar Tom Cruise-pølse, skal vere eit trekkplaster for Hellesylt.

Skal stille ut motorsykkel
Den nyaste «Mission: Impossible»-filmen som nyleg hadde premiere, vart delvis spelt inn i Sunnmørsbygda, og no håpar dei på å hauste litt av merksemda.

Tom Cruise utførte mellom anna eit stunt der han køyrde utfor fjellet Helsetkopen på motorsykkel. Restane av motorsykkelen skal monterast i ein glasmonter i Hellesylt sentrum, på Tom Cruise-plass.

Bygda satsar stort og har invitert filmstjerna sjølv som heidersgjest til opninga av motorsykkelutstillinga.

Reiselivsekspert, Odd Roar Lange, meiner likevel at norske bygder bør utnytte filminnspelingar i mykje større grad og at Hellesylt allereie er litt seint ute med filmturismen.

– Ein må byrje tidleg, og ein må teppebombe marknaden med informasjon. Ein må verkeleg gjere slik at dei som jobbar med det er møkk lei av å snakke om Tom Cruise. Då byrjar det å fungere andre stader, seier han.

(©NPK)