I mål med årets største oppdrag

I helga gjekk den årlege festivalen Jugendfest av stabelen i Ålesund.

Momentium som står bak arrangementet, har jobba mykje med å få næringslivet til å bruke festivalen. Dei er nøgd med responsen og opplever at bedrifter har vorte meir bevisste på å bruke kulturtilbodet i byen.

I tillegg til dei kring 8000 som hadde vanlege dagspass, er det kvart år ein rekke bedrifter som kjøper ulike pakkar med billettar og servering i tredje etasje på Color Line.

– I år det er dekka til 600 personar her, så vi serverer godt over 1000 personar i løpet av helga, fortel Ante Giskeødegård i Momentium til Nett No.

– Årets høgdepunkt
Det er Norbruk som står for alle servering og matlaging til dei inviterte gjestane under festivalen.

– Denne helga er årets høgdepunkt og det største oppdraget vi har i løpet av året, fortel Ronny Kolvik til Nett No.

Ein rekke bedrifter har bestilt eigne bord under Jugendfest og store selskap som Vard har også eigen losje for sine gjestar.

I tillegg til Norbruk sine kokkar og serveringspersonale, får dei ei handsrekning frå frivillige frå idrettslag og andre organisasjonar som jobbar for festivalen denne helga.

Ligg an til dobla omsetning i år
Ronny Kolvik er medeigar i selskapet som blei etablert under namnet Nor Facility, og starta opp saman med Roger Sørheim som er dagleg leiar.

Firmaet driv både med catering, kantinedrift og reinhald, men matverksemda utgjer hovuddelen av drifta. Kolvik er sjef for alt som har med mat å gjere i selskapet.

– Vi starta i 2021, så vi er framleis ganske nyetablerte. Målet er å bli godt etablerte på Nordvestlandet i løpet av dei fem første åra. Så langt har vi opplevd god vekst og vi vil nærme oss 100 millionar i omsetning i år, fortel han.

Med andre ord ligg dei an til ei dobling av inntektene frå i fjor, då rekneskapen viste knappe 38 millionar i omsetning.

God lønnsemd frå starten
Kolvik er mest kjent i lokalmiljøet som eigar og drivar ved Ålesund-restauranten Bro. Han er framleis involvert i det administrative arbeidet i dette selskapet.

– Vi forsøker å ta med oss ein del av filosofien frå restaurantdrifta til kantinene våre, med å lage kvalitetsmat frå botnen av. Vi ser at folk sett pris på å kunne jobbe med å lage skikkeleg mat også på dagtid, legg han til.

Lønnsemda i Norfacility har vore god sidan oppstarten med ein resultatmargin på godt over ti prosent i 2023 og 2022 (sjå tabell under).Firmaet hadde 35 årsverk i arbeid fjor.