Kamp mot langtidsfråvær og skjult byråkratisering

Denne veka la Høgre fram sitt utkast til partiprogram som seier kva partiet vil jobbe med den neste perioden.

I forkant tok Nett No ein prat med Høgre-leiar Erna Solberg for å høyre kva ho meiner er viktig framover.

Å få ned langtidssjukefråveret er ein av dei viktigaste oppgåvene framover, meiner Solberg. Det er likevel uaktuelt å kutte i sjukelønnsordninga, slik andre parti på borgarleg side har føreslått.

Vil ha «ny balanse» i sjukelønnsbetaling
Høgre-leiaren trur i staden på det ho kallar ein «ny balanse» mellom kva det offentlege og arbeidsgivar betalar ved sjukefråver.

– Det kan vere arbeidsgivar skal betale for litt færre dagar i starten av ei sjukemelding, og litt meir mot slutten, seier ho.

Solberg påpeiker at ein del sjukefråver har å gjere med tilrettelegging på arbeidsplassen.

– Slike grep kan gjere at folk kan komme tilbake i arbeid tidlegare, legg ho til.

Svenskane får mindre sjukelønn
Fleire meiner årsaka til at Norge har eit høgt sjukefråver samanlikna med andre land, er fordi ordningane er meir generøse.

I Sverige får dei som er vekke frå jobb utbetalt mindre i lønn, i tillegg til at dei har innført ein sokalla karensdag – som gjer at tilsette ikkje får lønn første dagen ein er sjuk.

Solberg meiner Norge si ordning er å føretrekke.

– Vi har brukt ein del av oljepengane våre på betre privat helse, også har vi ein litt større offentleg sektor der vi har behaldt nokre ordningar som Sverige har fjerna, seier ho.

– Norge er eit dyrare land
Partileiaren peiker vidare på at direkte samanlikningar, til eksempel at Norge har større utgifter til offentleg sektor enn mange andre land, ofte går glipp av skilnader som må takast med i berekninga.

– Vi er eit rikare og dyrare land. Det gløymer mange i slike samanlikningar. Vi har til eksempel eit lønnsnivå som ligg 30 prosent over våre naboland. Folk samanliknar tal som om vi er like på lønn og andre forhold. Men det er vi ikkje, seier ho.

Arbeidsavklaringspengar er likevel eit område Høgre-leiaren vil stramme inn på.

– Det er ikkje motivert av å spare pengar, men fordi vi er nøydd til å skape endringar som gjer at folk kjem i arbeid, seier ho.

Meiner det er viktig med systemreformar
Mindre byråkrati er eit anna område som vil vere viktig for ei eventuell ny Solberg-regjering etter valet neste år.

Det vil ho mellom anna løyse ved å bruke meir pengar på digitale løysingar som samla får ned dei offentlege utgiftene.

– Det er viktig å få gjennomført systemreformar. Det handlar ikkje berre om å kutte i offentleg forbruk, men også korleis vi brukar ressursane på ein god måte, slik at det er mogleg å levere fleire tenester, legg ho til.

Vil ha bukt med «skjult» byråkratisering
At Norge til eksempel har fleire legar og sjukepleiarar enn ein del andre land, kan vere naturleg ut frå avstandar. Men det er ikkje nødvendigvis heile forklaringa.

– Vi har sagt at vi må gå gjennom offentleg sektor for å sjå på det vi har kalla den «skjulte» byråkratiseringa, seier ho.

Solberg meiner det også dreiar seg om måten det blir jobba på. Til eksempel meiner ho ein må unngå at høgt utdanna legar brukar tid på oppgåver som kan gjerast av andre.

Det var resultatet på eit sjukehus partileiaren nyleg besøkte. Dei nye datasystema snakka ikkje samen, samtidig som legesekretærane er fjerna.

– Difor må kirurgar bruke fleire timar kvar dag på å skrive inn data, når dei burde behandla pasientar i den tida.

Vil redusere formuesskatten og lakseskatten
Erna Solberg kjem med få konkrete forslag til kutt i offentlege utgifter. Slik er det også i det nye utkastet til partiprogram.

Samtidig har ho gjort det klart at partiet både vil fjerne formuesskatt på arbeidande kapital og redusere nivået på lakseskatten.

– Den kraftige auken i skatt for bedriftseigarar har skapt ein genuin frustrasjon, sa Solberg i eit intervju Nett No publiserte førre veke.

Skattekronene vil Høgre hente inn på andre områder, og partileiaren stadfestar at auke i selskapsskatten er eit aktuelt alternativ.