Kvar tredje konkurs i bygg og anlegg

Selskapet Emineo Bygg melde før helga oppbod til Møre og Romsdal tingrett.

Byggfirmaet som blei starta i 2017, hadde 18 tilsette det det gjekk konkurs. Dei har halde til i Søviknes og vore del av Emineo-konsernet.

Bransjen toppar konkursstatistikken
Av 73 konkursar som tingretten har opna så langt i år, har 24 av dei vore i selskap i bygg- og anleggsbransjen.

12 av konkurssakene har skjedd i varehandelen, medan sju har skjedd i serveringsverksemder.

Som NETT NO omtalte i vår, er no talet på konkursar tilbake på nivået før pandemien. Årsaka er at skattestyresmaktene har vore tilbakehaldne med å forfølgje krav mot bedrifter som til eksempel ikkje har betalt skatt og moms.

Krav frå styresmaktene var også den utløysande årsaka til konkursen i Emineo Bygg, ifølgje Sunnmørsposten.

Styreleiar Stian Volstad fortel til avisa at dei ikkje klarte å drive lønsamt under pandemien, og at dei utsette betaling av moms og skatt. Då dei framleis ikkje hadde funne ei løysing på utfordringane, såg dei ikkje anna utveg enn å melde oppbod.

Bustyrar Bjørn-Ivar Borgund opplyser at gjelda i selskapet er på kring 9,4 millionar kroner, og at mykje av dette er konserngjeld.

Systerselskap konkurs i 2020
Det konkursråka firmaet har vore del av Emineo-konsernet, som består av til saman 11 selskap.

Emineo Gruppa, som er eigd av Stian Volstad og Børt Tore Marthinussen, har eigd alle aksjane i Emineo Bygg.

Leiinga har forklart at heile konsernet blei prega av at dei tapte tre større kontraktar i 2019. I kjølvatnet av dette, blei systerselskapet Eminio slått konkurs.

Stort underskot og tapt eigenkapital
Firmaet har gått med underskot i tre av dei fire åra fram til 2021. Dei to siste åra var underskotet på samla 11,7 millionar av ei omsetning på 38 millionar kroner.

Leiinga påpeika allereie i 2020-rekneskapet at eigenkapitalen var tapt.

Konklusjonen var at det likevel var grunnlag for vidare drift. Eksterne kreditorar fekk då betalt på forfall og selskapet hadde ingen ekstern langsiktig gjeld.