Maritim opptur gir kraftig auke for Ekornes

Når den maritime klynga samlast til sin årlege konferanse i Ålesund onsdag vil dei få presentert tal som viser at det er gode tider for store delar av bransjen. 

Oppsvinget med auke i skipsbygginga gir også ringverknader utover den maritime industrien. 

Kraftig auke på kontraktsmarknaden
Møbelprodusenten Ekornes er mellom dei som er store leverandørar til mange av båtane som byggjast. 

Salsdirektør for kontraktsmarknaden, Helge Overå, stadfestar at dei merkar godt at den maritime klynga har fått meir å gjere. 

– No er det meir fart i alle segment, men på den maritime delen har det vore ekstremt. Hittil i år har vi hatt ei kraftig auke i kontraktsmarknaden samanlikna med i fjor, seier han til Nett No. 

Opplevde dupp i kjølvatnet av korona
Kontraktsmarknaden gjeld oppdrag for alt frå restaurant og hotell, til offentlege og private bygg – i tillegg til fartøy.

Verksemda skil seg frå sal mot privatmarknaden ved at det gjerne er langsiktige kontraktar som blir sikra gjennom store forhandlarar. 

Salsdirektør Overå fortel at dei opplevde noko av den same duppen i aktiviteten, som kom i privatmarknaden i kjølvatnet av koronaboomen. 

– Spesielt kontor- og hotellutbyggingar vart sett på vent. Men på den maritime sida tok det i staden av – og i år har alle segment hatt auke, legg han til. 

60 prosent blir selt til utlandet
Arbeidet med kontraktsmarknaden er samla i Ekornes Interior Solutions, men tala er ikkje skilt ut i den offentlege rekneskapen. 

Overå vil ikkje opplyse kva omsetninga er på i kroner og øre. Men om aktiviteten deira blei skilt ut frå konsernet, ville dei vore størst i landet på sitt felt. 

Også i kontraktsmarknaden går mykje av salet til utanlandske kundar. Overå fortel at dei ligg på ein eksportdel på 60 prosent. 

– Vi er med på mykje maritime messer rundt om i verda, og har samarbeidspartnarar som følgjer opp prosjekt. Vi har óg eigne interiørarkitektar som er involvert frå vår side, saman med alt frå salsavdeling og kundeservice, fortel han. 

Showrom på fire etasjar på Brunholmen
Mange av kundane i kontraktsmarknaden tek turen til Ekornes Bua på Brunholmen i Ålesund. Her har møbelprodusenten fire etasjar fulle med det nyaste dei kan tilby av ulike produkt. 

Om det gjeld bygging av eit nytt skip kjem gjerne store delegasjonar med skipseigarar, verft og innreiingsselskap saman for å sjå nærare på utvalet.

– Kundane våre er flinke til å bruke showrommet vårt og ta med sine kundar hit. For dei veit at dei får god service, og samtidig sett og prøvde alle møblane, seier Overå. 

Han påpeiker at det er viktig for dei både å levere møblar med kvalitet, men også vere punktleg på levering. 

– For mange er det viktig, og spesielt for maritime prosjekt der det er ein tidsplan der båten skal døypast og skal i arbeid, legg han til.