Vil dele arbeidskvardagen med fleire

Førre veke blei oppstarten av Cowork-prosjektet i Ulsteinvik markert på Skaparhuset. Til stades var både ordføraren og inviterte personar som kan vere potensielle brukarar.

Mellom dei var Ellen Skodjevåg Bø som vil teste det nye tilbodet.

– Det å få dele arbeidskvardagen med nokon kan bli veldig spennande, fortel ho til NETT NO.

Ser fleire fordelar
Ulstein-kvinna starta i 2015 opp selskapet Sytalaust som leverer tenester innan kommunikasjon og sal. Etter fleire år på heimekontor ser ho føre seg å bruke arbeidsfellesskapet nokre dagar i veka.

– Oppmøte på Skaparhuset viser tydeleg at det er fleire enn meg som ser verdien av Coworking i Ulsteinvik. Magi skjer i møte med andre mennesker, og det blir inspirerande å lære nye folk og bransjar å kjenne. Og kven veit, kanskje vil dette samarbeidet gi fleire oppdrag til Sytalaust, seier Bø.

Andre fordelar ho ser er deling av kunnskap – og ikkje minst det sosiale rundt lunsjbordet. Det er også
fleire alternative arbeidsplassar med stillerom og eigne kontor.

Eitt av åtte Cowork i fylke
Arbeidsfellesskapet er eitt av åtte slike Cowork på bygda-prosjekt, som er i gong, eller i ferd med å starte opp etter å ha fått støtte frå fylkeskommunen.

Kommunen er med som samarbeidspartnar, saman med Ulstein Næringsforum og Skaparhuset. Kjersti Kleven ved Skaparhuset held i mange av dei praktiske trådane, saman med Anne Klara Måseide i næringsforumet.

– Dette er eit utviklingsprosjekt og no startar vi med å samle informasjon om behovet, fortel Kleven til NETT NO.

Inviterte ulike brukarar
Til «kick-off»-arrangementet hadde dei både invitert «heimebedrifter» og personar som pendlar til andre plassar – men kan tenke seg nokre dagar ved ein slik møteplass. Eit oppmøte på kring 20 personar seier Kleven seg godt nøgd med.

– Vi har etter kvart også ganske mange i lokalmiljøet som jobbar på heimekontor for selskap som held til i Oslo, eller Bergen. I samband med Covid opplevde fleire at det var betre at folka deira flytta heim, enn at dei slutta, fortel Kleven.

Det skandinaviske konsulentselskapet Bouvet er mellom dei som har fleire tilsette på søre Sunnmøre, og er andre aktuelle brukarar av arbeidsfellesskapet.