Planlegg produksjon i 2027

Ideen til Ålesund-selskapet Recuro er å resirkulere plastavfall som i dag går til forbrenningsanlegg. Avfallet skal omdannast til gass og olje - som vil bli brukt til å produsere nye plastprodukt.

I fjor henta Recuro inn 13 millionar kroner i ny eigenkapital. I år er det henta inn ytterlegare 7,6 millionar kroner, i hovudsak frå eksisterande aksjonærar.

No arbeider selskapet med ein ny og større emisjon, som ein del av finansiering av eit pilotanlegg.

Dagleg kapasitet på 25 tonn
Dette skal kunne ta i mot og behandle 25 tonn plastavfall om dagen.

Målet er å ha pilotanlegget i drift i 2027, seier dagleg leiar Arve Jakobsen i Recuro til Nett No.

Neste mål er eit fullskala-anlegg med fire gangar så stor kapasitet.

Førebels vil han ikkje kommentere kor stor den pågåande kapitalutvidinga skal bli.

Investorar på Nordvestlandet
Recuro skal omdanne plastavfall til gass og olje i ein kjemisk prosess ved å bruke elektrisitet og induksjonsprosess.

Ideen spring ut av miljøet rundt selskapet Effee, som blei grunnlagt med utgangspunkt i i å bruke ein induksjonsprosess i metallsmelteomnar.

Ei rekkje investorar på Nordvestlandet medeigar i Recuro; metallstøyperibedrifta Oshaug i Molde, Leif Arne Langøys famileiselskap Lapas, Moldeinvestor Sveinung Henden og Effegrunnleggar Erik Belland. Belland er også grunnleggar av Recuro, og styreleiar i selskapet.

Recuro har i alt 79 medeigarar ifølgje bedriftssdatabasen proff.no. Den er oppdatert per årskiftet.

Sirkulær økonomi
I fjor venta Recuro at pilotanlegget skulle vere klart neste år. Det er for tidleg, men selskapet har hatt framdrift heile vegen, ifølgje Jakobsen.

- Det er eit utviklingsprosjekt dette her og ting dukkar opp. Det hender du må ta ein ekstra sving for å kome fram, seier Jakobsen.

Eit viktig poeng med ideen bak Recuro er at selskapet sin metode gjer at for eksempel fiskekasser basert på plast, kan bli til nye fiskekasser.

Med ei mekanisk nedbryting av slike produkt kan dei ikkje brukast til å lage nye fiskekasser, på grunn av smittefare.

Å omdanne avfallet til gass og olje først, løyser det problemet og gjer at fiskekasser kan bli til nye fiskekasser.

Anlegg på Austlandet
I fjor låg Mongstad i Hordaland an til å bli staden der Recuro skulle bygge pilotanlegget sitt.

No er Recuro i sluttsamtaler med eit stort europeisk selskap om eit samarbeid om å bygge pilotanlegget på Austlandet, ifølgje Jakobsen.

Kven som er samarbeidspartnaren og nøyaktig kvar anlegget skal ligge, vil Jakobsen førebels ikkje kommentere.

Grunnen til at Austlandet blir vald som plassering av pilotanlegget er at det vil gjere det råd for Recuro å få brukt også gassen frå omdanning av plastavfallet - ikkje berre oljen.

Det gir betre ressursutnytting og betre økonomi.