Satsar på ny kapitalinnhenting

Innsparingane i å bygge to oppdrettstankar samstundes, i staden for berre ein, ligg bak avgjerda til det landbaserte oppdrettselskapet OFS om å gjennomføre ei kapitalutviding til.

Pengane om kom inn i førre kapitalutvideing finansierer eitt kar, men ved å hente inn rundt 35 millionar kroner til, kan det byggast to, fortel styreleiar og medeigar Ronny Magne Almenning til Nett No.

- Vi kjem til å gå ein runde til i kapitalmarknaden, seier han.

Satsar på postsmolt
OFS (Onshore Salmon Farming) har kontor og pilotanlegg i Barstadvika, mellom Måløy og Raudeberg i gamle Vågsøy kommune.

Tanken i pilotanlegget selskapet har i dag rommar 254 kubikkmeter vatn. Dei nye tankane skal romme omlag 2800 kubikkmeter kvar.

Opphavleg var ideen til OFS å drive landbasert oppdrett av matfisk, altså frå smolt og fram til slakting. No er planen å drette opp såkalla postsmolt. Det er fisk som er klar for å settast ut i oppdrettsanlegg i sjøen, men som først har fått vakse seg større i anlegg på land.

Anlegget er eit såkalla hybrid RAS-anlegg, der omlag 15 prosent av vatnet blir skifta ut og resten rensa og resirkulert. Eit reindyrka RAS-anlegg har ei mindre utskifting.

Meir lønsamt
OFS skal ta i mot smolt på 80-100 gram og la fisken vekes til rundt 800 gram i selskapet sine saltvasstankar.

Syklusen frå 80-100 til 800 gram gram tek tre-fire månadar. Når fisken er så stor før den blir sett ut i sjøen betyr det at den kan stå kortare tid i sjøbasererte oppdrettsanlegget før den er klar for slakting. Dermed aukar kapasiteten til sjøbaserte oppdrettsanlegg.

OFS si vurdering er at postsmolt er meir lønsamt å satse på samanlikna med å drette fisken opp heilt fram til slakting, seier Almenning.

Lang prosess
Hallen tankane skal stå i har vore klar i over eitt år. Almenning seier selskapet håpar på å vere i gang med bygginga av tankane i fjerde kvartal i år og kunne sette ut den første fisken i andre halvår 2025.

Akkurat korleis den komande kapitalutvidinga skal gjennomførast er ikkje avgjort, men ifølgje Almenning ligg det an til at også denne kapitalinnhentinga skal skje i samarbeid med folkefinansieringsselskapet Dealflow, som i førre runde.

Per i dag har selskapet 287 aksjonærar.

Den førre kapitalutvidinga i selskapet starta før jul i fjor, med mål om at den skulle vere ferdig før året var omme. Fristen for å teikne seg vart utsett fleire gangar, og minstemålet for kapitalutviding var nådd i mars i år, ikkje lenge før absolutt siste frist for kapitalutvidinga, 31. mars i år.