Green Yard Kleven har kome eit viktig steg vidare i arbeidet med deira første nybygg. Nyleg blei skroget sjøsett ved Montex-verftet i Polen, opplyser verftet i ei melding.
Konsernsjef Hans Jørgen Fedog opplyser til Nett No at slepet av skroget mot verftet på Sunnmøre startar i midten av april månad.
Vel framme ved Green Yard-verftet i Ulstein er det klart for utrustning av skipet. Tidlegare er det opplyst at skipet skal leverast i løpet av 2026.
Skal ut i arbeid i Svartehavet
Fedog påpeiker at sjøsettinga er ein viktig milepåle i oppdraget. Skipet er tinga av det rumenske energiselskapet OMV Petrom.
Nybygget blei annonsert i november 2024, og er det første som verftet har fått inn i ordreboka med eigarane i Green Yard.
Namnet på konstruksjonsskipet blir «Elisa» og det skal ut i arbeid i energisektoren i Svartehavet.
Fekk ideen i 2006
Skipet er designa av Marin Teknikk i Herøy. Marin Teknikk-sjef Svein-Rune Gjerde fekk ideen til skipet allereie i 2006.
Nybygget er eit avansert feltstøttefartøy for operasjonar og vil vere skreddarsydd for vindkraftindustrien. Det kan vere base for teknikarar, gjere lettare vedlikehald-, inspeksjon- og reparasjonsoppdrag, i tillegg til å frakte folk og forsyningar.
Det er plass til opptil 90 personar om bord på det 90 meter lange skipet.
Publisert: 31.03.2026 11:00
Sist oppdatert: 31.03.2026 12:34
