Sjette år med underskot for båtbyggjarar

Etter fem år i minus håpte Maritime Partner i Ålesund å kome i pluss i fjor, etter å ha hanka inn ein rekke nye oppdrag.

2022-rekneskapen som no er klar frå Brønnøysundregistera, viser likevel eit nytt underskot for båtbyggjarane som held til i Breivika.

– Vi hadde eit par prosjekt som blei forseinka, og den innteninga vi håpte skulle komme i fjor, kjem heller i år, fortel administrerande direktør Torstein Heggstad til NETT NO.

Ålesundaren tok over roret i selskapet tidlegare i år, medan mangeårig leiar Peder R. Myklebust gjekk over i ei ny stilling.

Trur på pluss i år
Maritime Partner leverte 30 båtar i fjor. Det førte til at inntektene gjorde eit solid byks i fjor samanlikna med året før, og enda på knappe 183 millionar kroner.

I år har ordrereserven auka og reknar selskapet med å levere fleire båtar enn i fjor. Heggstad trur på pluss i rekneskapen.

– Vi er på rett veg og resultatet blir betre i år. Men det er vanskelege rammevilkår vi jobbar under for tida, og eg vil derfor vere forsiktig med å komme med for presise prognoser for året som heilheit, legg han til.

Auken i aktiviteten førte óg til fleire tilsette med ei auke i talet på årsverk frå 37 til 44 frå 2021 til 2022.

Marknaden tilbake mot normalen
Selskapet har spesialisert seg på mindre hurtiggåande båtar og marknaden er på god veg tilbake til normalen i kjølvatnet av koronapandemien, skriv styret i årsmeldinga.

Spesielt marknaden for turistbåtar har vore svak dei siste åra, men også her kjem det no førespurnader fortel Heggstad.

– Vi jobbar med oppdrag både til forsvarssegmentet og persontrafikk - som ambulanse og hurtigbåtar. I tillegg er det meir aktivitet i dei tradisjonelle næringane som offshore, mellom anna med mobbåtar, fortel han.

Søksmål etter Brim-brann
I årsmeldinga kjem det også fram at selskapet i fjor fekk eit økonomisk krav mot seg etter brannen om bord i MS Brim, som selskapet leverte i 2019.

Saka som også gjeld manglar på systerfartøyet, er venta å kome for retten i oktober.

Styret skriv at dei i samråd med juridiske rådgjevarar, har kome fram til at søksmålet mest truleg ikkje når fram, og det er difor ikkje sett av midlar i rekneskapen.

Eigenkapitalen var på 10 millionar ved utgangen av fjoråret og langsiktig gjeld på kring 5,6 millionar kroner, ifølgje konsernrekneskapen som inkluderer UFAS Holding og Maritime Partner Asia.