Slik jobba dei fram nyskapande turistbåt

Designar Torstein Aa fortalde torsdag deltakarane på industridesignkonferansen Industrial Design Conference 2021 på Giske, om arbeidet med å designe en ny type turistbåtar.

Båtbyggjeriet i Hyen har dei siste åra fått stor merksemd for den nye designet som førebels har resultert i tre nybygg: «Future of the Fjords», «Vision of the Fjords» og «Legacy of the Fjords».

– Då vi starta designprosessen forsøkte vi å nullstille oss, fortalde Aa innleiingsvis.

Krava dei sette opp i starten var at turistbåtane skulle vere oppsiktsvekkande, ha god design, god komfort – også skulle dei løfte sightseeing-opplevinga.

Universell utforming la føringa
Universell utforming var førande i arbeidet med finne ut korleis båten kunne sjå ut.

– Vi har fått noko heilt nytt ved å bruke det frå starten av prosessen, fortalde Aa.

Han fortalde at dei begynte å utforske ein ide om at båten skulle få form av ein slags spiral, der passasjerane kunne bevege seg oppover i fartøyet på «gangvegar» utandørs.

– Det er kring ein meter med rekkverk til kvar passasjer, så det er ein romsleg båt, fortalde han.

Stigninga på arealet utandørs, gjer også at folk ikkje står i vegen for kvarandre sin utsikt. På toppdekket er det 360 graders utsikt.

(saka held fram under)

Bestemte seg raskt for å bygge
Torstein Aa fortalde at heile prosessen frå dei første skissene kom på bordet – til ideen blei presentert for reiarlaget The Fjords, berre tok to-tre månader.

Reiarlaget tente på ideen med ein gong, og bestemte seg for å bygge det første fartøyet same dag dei fekk presentert designet. Til no er det bygd tre slike båtar, og designaren fortel at det har vore interesse for å bygge fleire.

– Det har vore konkrete prisførespurnader frå utlandet, men det har ikkje resultert i fleire avtalar så langt. Vi er nok litt dyre, men interessa er der, la han til.

Tredje generasjon skipsbyggar
Torstein er tredje generasjon skipsbyggar ved verftet i Hyen, og har vore skipsdesignar i 13 år i bedrifta som blei starta av bestefaren og broren hans.

– Dei skjønte tidleg at dei måtte være på topp teknologisk for å bygge båtar på ein så liten plass, fortalde han - og slik er det framleis, om ein skal drive båtbygging i høgkostland.

Båtbyggjeriet i Nordfjord har dei siste åra har vekse på å bygge hurtiggåande båtar i karbonfiber. Ved å bruke dette materialet kan dei lage lettare båtar, enn i andre material. Det gir naturlegvis også mindre utslepp.

– Det gjer at vi kan bygge båtar som er 30-40 prosent meir energieffektive, enn båtar i andre material, la han til.

I løpet av året har Brødrende Aa levert to båtar – Sigrid Sigurdsdotter og Liv Grannes - til Torghatten som skal trafikkere ruter i Nordland. Tidleg i år sikra verft seg kontrakt på tre båtar med ny design til det greske reiarlaget Attica Group.