– Stemninga dei siste åra har betra seg enormt

– Vi treng fleire hender rett og slett, seier Ståle Heggelund.

Heggelund er bransjesjef for maritim bransjeforening og havbruksleverandørene i Norsk Industri, og var vert på Verftskonferansen 2024 som blei avslutta onsdag.

Skipsverfta har tjukkare ordrebøker og betre lønsemd enn på mange år. Det slår også ut på humøret til aktørane i bransjen.

– Eg føler at stemninga dei siste åra har betra seg enormt, seier Heggelund.

Rekrutteringsutfordring
Skip under bygging eller i bestilling - og trua på fleire nye oppdrag framover, gjer at rekruttering har blitt den viktigaste flaskehalsen for bransjen.

Heggelund seier det både er blitt vanskelegare og dyrare å rekruttere frå utlandet. 

Han meiner verfta mellom anna er nøydd til å satse meir på å rekruttere lokalt. Det betyr og å rekruttere fleire som er i fare for å falle utanfor arbeidslivet. 

Fullt hus og internasjonalt besøk
Årets verftskonferanse samla 400 deltakarar. Det betyr fullt hus og at arrangøren nådde taket for kor mange som kan delta.

Den to dagar lange konferansen blir arrangert i starten av november kvart år, og alltid i Ålesund.

Konferansen hadde to hovudtema, forsvar og opprustning og bruk av kunstig intelligens.

Det norske byggeprogrammet for sjøforsvaret har vekt internasjonal interesse. Det gjeld spesielt dei planlagde fem nye fregattane. 

Regjeringa vil at fregattane skal byggast i samarbeid med allierte. Toppoffiserar og ansvarlege for innkjøp og bygging av skip til forsvaret i USA, Storbritannia, Tyskland og Frankrike var til stades på konferansen for å fri til norsk industri og styresmakter.

Meir frå konferansen: