Strønen venta kontraktar under Nor-Fishing

- Vi trur det er ein uforløyst marknad for nybygging, seier administrerande direktør Asle Strønen i sal- og marknadsføringsorganisasjonen Norske Skipsverft.

Allereie under Nor-Fishing, som startar i dag tysdag 23. august, kjem dei første kontraktane til å bli offentleggjort.

- Stemninga er optimistisk, seier Strønen og ventar nye kontraktar både i år, neste år og i 2024.

10 milliardar i fjor - halvparten i år
Organisasjonen Norske Skipsverft fører statistikk over kontraktar som er på minst 50 millionar kroner.

Hittil i år er det offentleggjort 19 nybyggingskontraktar hos norske skipsverft. Samla verdi på kontraktane er omlag 4,5 milliardar.

I heile fjor vart det offentleggjort 26 nybyggingskontraktar på i alt 10 milliardar kroner. Strønen reknar med at 2022 kjem til å ende omlag som i fjor.

Strønen understrekar til NETT NO at det i tillegg blir inngått fleire kontrakter - spesielt på arbeidsbåtar til oppdrettsnæringa- der kontraktsverdien er under 50 millionar.

Det er også ein viktig marknad for skipsverfta, ifølgje Strønen.

Todelt marknad
- Verftsindustrien er ikkje ei homogen masse. Vi arbeider i fleire nisjer. I reparasjon-/service-marknaden er det relativ grei ordreinngang og greie resultat, seier Strønen om resultata til skipsverfta (sjå tabell i slutten av artikkelen)

- Når det gjeld nybyggingsverft er det framleis god produksjonskapasitet og det er gledeleg at det fylles opp med store ordrar, slik som frå Remøy (Stig Remøy, red. merk) tidlegare i sommar og med båtar til oppdrettsnæringa, seier Strønen.

Vard-betring
Vard er framleis i minus, men meir enn halverer underskotet frå 2020 til 2021. Det er hovudårsaka til betre lønsemd for skipsverfta samla sett i fjor enn året før.

Vard har tre verft i Noreg, i Tomrefjord, Brattvåg og Søvik, og det klart største nybygginsselskapet i bransjen.

Tidlegare i sommar sa Vard-sjef Alberto Maestrini at målet er lønsam drift innan kort tid.

Til Nor-Fishing kjem også fiskeri- og havminister Bjørnar Skjæran (Ap).

Det er han som har ansvaret for skipsbyggingsbransjen i Nærings og Fiskerdepartementet. Han er den viktigaste personen å overtyde for skipsverfta, som ønskjer at Eksfin kan gi garantiar som gjer norske verft meir konkurransedyktige.

Dei siste vekene har Eksfin møtt motbør for planane om å utvide garantiane knytt til skipsbygging i Tyrkia.