Thorsteinn Magnus Aage 10d736c24b54623aee7c17f28e13399c
SATSAR: Dei la planar for å byggje eit slagkraftig offshoreselskap nord om Stad, og har lukkast. Frå venstre Thorsteinn Mar Baldvinsson, Magnus Roth og Åge Remøy. Foto: Kjetil Haanes
Nytt

Tener gode pengar i offshore

Har fått refinansiert PSV-gjelda og ser lyst på utsiktene framover.

02.08.2022

Det Fosnavåg-baserte selskapet Rem Offshore Holding har no presentert sine rekneskapstal for andre halvår 2021. Med rekneskapsmessig effekt frå 1. juli 2021 er holdingselsakpet 100 prosent eigar av Rem Offshore og 60 prosent eigar av Rem Wind, satsinga inn mot offshore vindmarknaden.

Rekneskapstala viser at flåten i andre halvår segla inn 288,5 millionar kroner. Driftsresultatet var på 30,8 millionar kroner, og resultatet før skatt 39,8 millionar kroner. I tala ligg også finansinntekt på 49 millionar kroner etter nedsal i eit dotterselskap.

Norsk-svensk-islandsk
Bak Rem-satsinga står trioen Åge Remøy, svensk-sveitsiske Magnus Roth og islandske Thorsteinn Mar Baldvinsson, alle med opphaveleg bakgrunn frå fiskeri. Dei tre eig kvar ein tredjedel i Rem Offshore Holding.

Ved utgangen av fjoråret hadde konsernet elleve skip i drift, fordelt på sju PSV-ar, to subseaskip og to seismikkskip. PSV-skipa segla inn 114 millionar kroner i andre kvartal, seismikkskipa 77 millionar, medan dei to subseaskipa Rem Saltire og Rem Inspector bidrog mest med 95 millionar.

I tillegg drifta Rem og var medeiegar ieit vindmølleskip for eit tilknytta selskap.

Rem Saltire
SUBSEA: God inntening for Rem Saltire. Skipet er no i Mexicogulfen, men ligg her ved kai på Hellesylt. Foto: Rem Offshore

Refinansierte PSV-ane
I årsrapporten skriv styret at ein har satsa på langsiktige kontraktar, og flåten har hatt god aktivitet i 2021 og hittil i 2022. Det blir også vist til at ratene har stige betydeleg i 2022, slik at ein ser optimistisk på framtidsutsiktene.

For Rem PSV er det inngått ein ny langsiktig refinansieringsavtale med løpetid fram til 1. kvartal 2025. I samband med refinansieringa har eigarane skote inn 30 millionar kroner.

Nye kontraktar
Rem har nyleg inngått nye kontraktar for tre PSV-ar, og forlenga for ein fjerde.

Rem Arctic har fått kontrakt med Serica UK for ein brønn, med opsjon på ytterlegare fire brønnar. Om alt vert gjennomført, er kontrakten på 220 dagar.

Rem Fortress har fått kontrakt med Ithaca UK for eit brønnprogram på totalt 700 dagar.

Rem Supporter har fått kontrakt med Saipem Ltd for vindparkprogrammet Neart Na Gaoite utanfor Skotland. Denne kontrakten er på 345 dagar, pluss opsjonar.

I tillegg har Equinor forlenga avtalen med Rem Commander til 29. september.

Konsernet har ei langsiktig gjeld på 1066 millionar kroner og ei samla gjeld på 1781 millionar.

Eigenkapitalen ved årsskiftet var på 847 millionar.

Nye oppkjøp
Då Remøy, Roth og Mar Baldvinsson etablerte selskapet for seks år sidan, var målet å byggje eit slagkraftig offshoreselskap nord om Stad. Trioen har halde fram veksten i 2022, først ved å kjøpe fire skip frå K-Line. Desse skipa er lagde inn under selskapet Rem Service, og kjøpet er finansiert med 50 prosent eigenkapital og 50 prosent banklån. Alle skipa går på langsiktige kontraktar.

I juli kjøpte ein i tillegg to åtte år gamle Myklebust-bygde PSV-ar frå Atlantic Offshore.

I tillegg har ein under bygging to spesialskip for offshore vind hos Vard, med opsjon på ytterlegare to skip.

Kontrakten på dei to første skipa har ein verdi på 100 millionar euro. Første skipet skal leverast frå Vard i første halvdel av 2023.

Publisert: 02.08.2022 06:53

Sist oppdatert: 02.08.2022 08:53

Mer om