Treng meir tid til å bestemme bruken av tunnelsteinen

Dette kjem fram av ei orientering frå Kystverket.

Dei tre kommunane rundt den 2,2 kilometer lange skipstunnelen, Stad, Kinn og Vanylven, ønsker å bruke mest muleg av dei seks millionar kubikkmetrane med sprengt fjell.

Det vil dei nytte til lokale næringsprosjekt, som hamne- og moloutbygging, utviding av eksisterande næringsområde og utfylling til nye område. Dermed kan prosjektet bidra til regional næringsutvikling og auka verdiskaping og sysselsetjing i ein pressa region.

Kystverket hadde planar om å lyse ut konkurransen om totalentreprisen på prestisjeprosjektet i slutten av året.

No skriv Kystverket at dette kan verte utsett til starten av 2023, ettersom kommunane treng meir tid til å prioritere og regulere massetiltaka.

Parallelt med dette arbeidet er Kystverket, Stad kommune og Multiconsult i gang med detaljreguleringar rundt tunnelopninga på Kjøde og Lesto i Moldefjorden, samt områda rundt.

Kystverket opplyser at Kystverket og Stad kommune inviterer innbyggjarane i Kjøde og Moldefjorden til informasjonsmøte om den komande skipstunnelen torsdag 23. juni. Det blir arrangert møter i begge bygdene der tunnelopningane kjem.

Skal kartleggje synergiar
Kystverket opplyser at i tillegg er følgjande prosjekt på gang:

• Kystverket og vertskommunen Stad kommune har utarbeidd ein samarbeidsavtale som vert lagt fram for politisk handsaming i Stad kommune i juni.
• Eit moglegheitsstudie som skisserer potensiale for utvikling og satsingar i nærområda til skipstunnelen blei lagt fram for Stad kommunestyre 12. mai (v/Nordplan). Moglegheitsstudiet vert no samanfatta i ein masterplan med konkrete anbefalingar for moglege tiltak.
• Stad kommune er med som følgjekommune i Gnist-prosjekt i Vanylven.
• Vanylven kommune har i lag med 10 andre kommunar blitt valt ut som Gnist-kommune. Som Gnist-kommune får Vanylven hjelp til å utforske korleis synergiane frå skipstunnelen kan utnyttast til å gjere kommunen meir attraktiv i form av auke bustad- og næringsaktivitet. Vanylven ønske å få kartlagt moglegheiter ut over det som gjeld overskotsmasse
  og handtering av denne. Målet er at dette skal kunne bidra til å snu utviklinga med nedgang i talet på innbyggjarar.
• I juli eller august vil Multiconsult gjennomføre grunnundersøkingar i sjøen i Kjøde i samband med ny reguleringsplan for eit industriområde.