Tøffare i fiskevegnbransjen

Bedriftene som lagar garn, nøter, liner, teiner og anna utstyr fiskarane treng for å få fangsten om bord, har blitt større gjennom oppkjøp.

Men dei har ikkje blitt meir lønsame, tvert i mot.

Resultatmarginen - resultat før skatt i prosent av driftsinntektene - har krympa for selskapa i Nett No si oversikt dei siste åra.

Sjå resultatoversikt under saka

Det er tilfelle også om vi held Mørenot Aquaculture utanfor, selskapet med størst underskot dei tre siste åra.

Mest att hos dei minste
I 2023 var det selskapet Fiskevegn som sat att med flest kroner i overskot i høve til driftsinntektene. Det er fjerde minste selskapet i Nett No si oversikt.

To av selskapa som er enda mindre, Frøystad og Fosnot har høvesvis andre og tredje relative lønsemd.

Hos dei største er det berre Selstad-konsernet i Måløy som har ein resultatmargin på over to prosent.

Bakgrunn:

Fleire prishopp
Dagleg leiar Geir Johan Bakke i Frøystad ønskjer seg stabilitet.

I staden har han og resten av bransjen fått fleire kostnadshopp på sine råvarer dei siste åra.

– Konkurransesituasjonen er prega av at det er veldig gode konkurrentar. Og så har det vore fleire rundar med prisauke, og det har pressa marginane, seier Bakke.

Både Selstad- og Mørenot-konsernet har tidlegare varsla at dei er ute etter vekst også gjennom oppkjøp.

Den konsolideringa i bransjen som slike oppkjøp er en del av, trur Bakke vil halde fram - men nett no går den prosessen svært sakte. Renteauke og pressa marginar har gjort at bedriftene har nok med seg sjølv i ein periode, etter Bakke si vurdering.