Konkurrerer mest på pris

NETT NO-barometeret:

- Vi har vunne mange kontrakter med lavast dekningsgrad, seier Plany-sjef Kjell Åge Saure om korleis marknaden har vore så langt i år. Det betyr at det blir konkurrert på pris.

Selskapet i Sande lagar mellom anna luseskjørt til vern mot luseangrep i oppdrettsanlegg og presenningar for behandling mot lakselus i sjøbaserte oppdrettsanlegg. Bedriftene i bransjen Plany er i, lagar også garn, nøter, liner, teiner og tauverk for oppdrettselskap og fiskarar.

Den tøffe konkurransen viser seg også i rekneskapa til bedriftene (sjå tabell under). Samla sett fekk dei redusert resultatmarginen (resultatet før skatt i prosent av driftsinntektene) frå 2,4 prosent i 2021 til 1,8 prosent i 2022.

• Under vignetten NETT NO-barometeret, ser vi på korleis det går med bransjar på Nordvestlandet. Dette er niande artikkel med utgangspunkt i 2022-rekneskapa (sjå alle artiklane under)

Konsolidering
Bransjen er også prega av store selskap med ambisjonar om å bli enda større og å bidra til ei konsolidering i bransjen.

- Det er tøff marginpress og det er sterk konkurranse. Det at både vi og andre ønskjer å slåst om marknadsandelar, gjer at det blir slik, sa no avtroppande Mørenot-sjef Arne Birkeland til NETT NO i 2019.

Året før vart Mørenot kjøpt av investeringsselskapet FSN Capital, som varsla ambisjonar om vekst mellom anna gjennom oppkjøp og samanslåingar.

Overtok Mørenot-konsernet
Islandske Hampidjan var også på jakt etter Mørenot i 2018, men trekte seg frå konkurransen den gangen. Utviklinga for Mørenot-konsernet vart truleg ikkje heilt som FSN Capital venta, med tosifra millionunderskot og beskjeden vekst frå 2019.

I fjor kom Hampidjan på banen igjen og overtok Mørenot-konsernet tidlegare i år.

Best lønnsemd for Fiskeveg
Etter Mørenot-kjøpet har det islandske Hampidjan-konsernet fått eit større fotfeste i den norske marknaden. Dei to andre store aktørane er Egersund Group og Selstad-konsernet i Måløy.

På toppen, målt etter lønsemd, er Fiskevegn, med ein resultatmargin på over ni prosent både i 2021 og 2022.

Fiskevegn har spesialisert seg på liner og tauverk til linefisket, og søsterselskapet BFG (Best Fishing Gear) lagar automatiske linesystem. Dei to selskapa - med 40 tilsette - er dei viktigaste i Fiskevegn-konsernet, som har hovudkontor og hovudanlegg på Flatraket i Stad kommune.