Veks med maritimt taktskifte i India

Denne veka møtte ein rekke representantar frå maritim og marin industri på Nordvestlandet Indias ambassadør til Norge – og fekk samtidig høyre om moglegheitene for å gjere business i det folkerike landet.

Tidlegare klyngeleiar i Blue Maritime, Daniel Garden, var mellom dei som var til stades i kraft av si nye rolle som sjef for Maritime Montering Group.

Med ein ny handelsavtale på plass mellom Norge og India, er det utsikter til meir business landa i mellom. Langt lågare tollsatsar er blant utsikter for norske bedrifter framover.

– Norske leverandørar har vore nesten fråverande
Daniel Garden er ikkje i tvil om at det ligg meir til rette for satsing frå norsk næringsliv i India en nokon gong.

I takt med at det har vorte meir aktivitet med skipsbygging i India frå europeisk side, opplever Garden at norske bedrifter blir aktuelle som leverandørar til andre skipstypar - som frakt- bulk og konteinarskip.

– Det er verdas største skipssegment, der norske leverandørar har vore nesten fråverande, bortsett frå nokre få unnatak. No ser vi at norske selskap er interessante også når den type skip blir bygd i India, seier han.

– Trur reiarlaga er meir bevisste
Ei årsak til den utviklinga kan vere - som Innovasjon Norge påpeika under Ålesund-besøket – at avtalar som dei førarlause lasteskipa det indiske Cochin-verftet har under bygging for Asko Maritime, har gjort norske leverandørar meir kjent hos indiske aktørar.

Garden trur noko av årsaka ligg i at reiarlaga som no bygger ved indiske verft, ventar ein standard som norsk leverandørindustri kan oppfylle.

– Eg trur reiarlaga er meir bevisste på at skipa deira skal ha ein viss standard når det kjem til kvalitet. Det skal ikkje vere dyrt å vedlikehalde og dei skal vare lengre. Ofte kan det vere enkle løysingar, men dei skal samtidig vere solide, seier han.

Skjedd mykje på ti år
Garden ser at det har skjedd mykje i India sidan konsernet etablerte seg i landet første gong i 2010. Han var sjølv i India for ti år sidan.

– Den gong blei det sagt at det var store moglegheiter, men vi sleit med å identifisere dei. Då vi kom tilbake no, såg vi at det skjer mykje meir på skipsbygging enn det gjorde då, spesielt med europeiske reiarlag som bygger i India, seier han.

Slik verksemd var det lite av for ti år sidan, seier han.

– Vi har også auka veldig på skip som blir bygd i India av indiske reiarlag, legg Maritime Montering-sjefen til.

– Endringane skjer ikkje så fort
Det er spådd at den maritime industrien i India skulle vekse, og styresmaktene satsar mellom anna på å bygge ut infrastruktur for å bidra til målet.

Sjølv om Garden ser store endringar, går ikkje utviklinga i eit veldig høgt tempo.

– Endringane skjer ikkje så fort. Det er eit stort land som skal snu seg, seier han.

India er kjent som ein it-stormakt og digitaliseringa har kome langt også her. Berre for nokre år sidan måtte Garden ha reist til India for å signere papir. No kan det gjerast digitalt.

Starta samarbeidsselskap
Maritime Montering Group starta først eit samarbeidsselskap med ein indisk partnar. Desse er dei no i ferd med å kjøpe ut.

– I år kjøper vi også ein ny fabrikk, både for å produsere til eige behov, men også for å ha moglegheiter til å eksportere til eksterne kundar i Europa og Asia, seier Garden.

Viktigheita av å finne den rette partnaren å samarbeide med, blei understreka av Gry Svalheim frå krillprodusenten Rimfrost.

– Potensialet for høge volum er enormt
Svalheim si vurdering etter at selskapet har vore i India i to år, er at det har vore krevjande.

– Potensialet for høge volum er enormt, påpeika ho – men at det samtidig er avgjerande med ein lokal partnar som har nettverk og kunnskap om det regulatoriske – og kulturforståinga som trengst.

– No har vi gått opp løypa og håpar at den nye handelsavtalen skal gjere det enklare, la ho til.

Stort potensiale for omega 3-produsentar
Den nye frihandelsavtalen mellom India og EFTA-landa kan opne dørene til eit ny stor marknad for marin industri som omega 3-produsentar. Marknaden i India for denne bransjen er anslått å vekse til kring 20 milliardar kroner i 2026.

– Dei er verdas mest folkerike land og blir stadig meir bevisst dei helsemessige effektane av omega 3 og tilsvarande produkt, fortalde ho.

Lågare tollsatsar for norske leverandørar kan vere avgjerande i ein marknad som også er svært prisbevisst, var hennar vurdering.

– Dei som engasjerer seg, vil få moglegheiter
Indias ambassadør Dr. Acquino Vimal peika også på moglegheitene for auka eksport av norsk sjømat under sitt Ålesund-besøk.

Han viste til at ein sterk aukande middelklasse er i ferd med å utvikle nye vanar – og var ikkje i tvil om at 30 prosent lågare toll på norsk laks ville opne nye dører for norske bedrifter.

– Dei som engasjerer seg, vil få moglegheiter, fortalde han til Nett No.