Ventar på «grønt lys» om standardfartøy

Førre helg blei det klart at Norge skal kjøpe fregattar frå Storbritannia. Det vil vere den største investeringa til Forsvaret i moderne tid. 

Samtidig ventar den maritime industrien spent på kva som skjer med den neste store investeringa – nye standardiserte fartøy. 

Tidlegare er det opplyst at 28 standardisert fartøy skal byggjast i Norge. Det vil i tilfelle vere snakk om dei største oppdraga til verftsindustrien her til lands nokon gong. 

Ventar på klarsignal
Tidleg i mai fekk Nett No opplyst at det neste skrittet i prosessen var eit klarsignal frå Forsvarsdepartementet til Forsvarsmateriell til å starte eit forprosjekt om standardfartøya.

Der står saka framleis etter det Nett No får opplyst frå kommunikasjonsavdelinga til Forsvarsmateriell.

Nett No spurte Forsvarsdepartementet måndag kva tid dei rekna med at eit klarsignal for eit forprosjekt ville kome. 

Departementet kom ikkje med noko svar på spørsmålet før helga, og kommunikasjonsavdelinga viste fredag til at det hadde vore mange spørsmål om fartøy denne veka. 

Skal gjennom kvalitetssikring
Tidlegare er det laga ei konseptvalutreiing som er kvalitetssikra – og som Forsvarsdepartementet har til politisk behandling. 

I mai gjennomførte Forsvarsmateriell ei marknadsundersøking som skulle gi betre oversikt over kva moglegheiter for samarbeid ein kunne få med norsk industri om utviklinga av skipa. 

Innkjøpet skal følgje statens prosjektmodell. Etter at eit forprosjekt er ferdig skal det gjennom ei ekstern kvalitetssikring.

Etterpå kjem regjeringa til Stortinget som skal godkjenne investeringa. 

Ønsker seg rask avgjerd
Etter at fregattavgjerda blei kjent uttalte Mafoss-leiar Jan Thormodsæter at han venta regjeringa ville kome med ei snarleg avgjerd om standardfartøya. 

Tidlegare har styreleiar Eivind Reiten i Kongsberg Maritime gitt uttrykk for at han ønska at prosessen gjekk raskare. 

Statssekretær Marte Gerhardsen (Ap) ville i mai ikkje vere konkret på kva tid ei avgjerd om standardfartøya kjem, utover at den ville kome i «nær framtid». 

Mål om å levere første skip i 2028
I utgangspunktet er det snakk om 10 større skip som skal vere havgåande, og 18 mindre fartøy med sokalla kystnær plattform. 

16 av fartøya skal operere for marinen, som inneberer at dei vil ha meir avanserte våpensystem. 12 av fartøya skal være i kystvaktflåten. 

Ifølgje dei første anbodsdokumenta er ambisjonen at fartøya skal bli levert mellom 2028 og 2036.