Vil ikkje setje sluttdato for auka arbeidsgivaravgift

(NPK-NTB-Marius Helge Larsen): Statsminister Jonas Gahr Støre vil ikkje seie når den mellombelse auken i arbeidsgivaravgift skal fasast ut, men understrekar framleis at han er mellombels.

– Det er ikkje lagt ein timeplan for det. Vi kjem med eit revidert budsjett før sommaren, og vi kjem med eit statsbudsjett for 2024 til hausten, og då blir det gjort godt greie for det, sa statsminister Jonas Gahr Støre (Ap) til Stortinget onsdag.

Han svarte på spørsmål frå Høgre-leiar Erna Solberg om den mellombelse auken i arbeidsgivaravgift for inntekter på over 750.000 kroner.

Høgprisbidrag forsvinn
Støre vart også av Solberg beden om å gi ein sluttdato for høgprisbidraget for kraft, som regjeringa også har sagt er mellombels.

– Finansministeren har sagt frå denne talarstolen at det skal fasast ut innan utgangen av 2024. Det er regjeringsplanen, sa Støre.

Han understreka at høgprisbidraget er nettopp eit høgprisbidrag, og at det er ei avgift som berre gjeld når straumprisane overstig 70 øre per kilowattime.

– Det ville vore normale høge prisar før denne kraftkrisa kom, påpeika statsministeren.

Støre: Spleiselag
Han forsvarte dei mellombelse skattegrepa i statsbudsjettet for i år og meiner dei var nødvendige for å unngå kutt i velferd og kommuneøkonomi.

– Valet var mellom å ha store velferdskutt eller å ha eit spleiselag der dei med ressursar stiller opp. Eg trur den siste modellen er best, sa Støre.

Solberg meiner det finst andre løysingar enn auka avgifter.

– Vi klarte frå Høgres side å leggje fram eit alternativt statsbudsjett der vi ikkje trong å auke skattane på den arbeidskrafta vi treng endå meir av, den høgkompetente arbeidskrafta som vi framover treng for å ta dei store omstillingane i samfunnet vårt, sa ho.

(©NPK)