Vil lokke studentane ut i friluft - og til å bli

Måndag stod i friluftslivets teikn ved Campus Ålesund.

Ulike aktørar frå reiselivet, studentgrupper for friluftsaktivitetar og frivillige lag var invitert til NTNU i Ålesund for å presentere seg for studentane.

Eventyrar Cecilie Skog var det store trekkplasteret mot slutten av dagen. Sunnmøringen har skapt eit levebrød av sin lidenskap for å dra på tur i fjellet og åtvara studentane om at det kunne utvikle seg til ei sterk avhengigheit.

– Har aldri hatt ein forretningsplan
Sjølv som sunnmøringen elskar å vere ute i friluft – og gjerne anbefaler det til alle – vil ho ikkje råde nokon til å følgje i hennar fotspor når det kjem til karriere.

– Eg har aldri hatt ein forretningsplan, det har berre vore ein lidenskap, fortel ho til Nett No om verksemda ho har skapt i løpet av desse åra.

– Om det er noko som du verkeleg brenn for og berre må gjere, så kan det likevel vere ein veg å gå. Men eg seier ikkje til barna mine at dette er eit godt val for ein som vil bli gründer, legg ho til.

Turar, bøker og tv-program
Sunnmøringen var sjukepleiar då ho starta som fjellførar på Briksdalsbreen, og hadde tenkt seg tilbake til den jobben.

Slik vart det som kjent ikkje. For Skog utvikla turinteressa seg til å dra på ekspedisjonar til verdas høgaste fjell og nokre av klodens mest avsidesliggjande plassar. Undervegs har ho mellom anna gitt ut sju bøker, medverka i ein rekke tv-program og halde føredrag over det ganske land.

Etter at ho vart småbarnsmor har ho også roa ned på føredragsverksemd og reising nokre år.

– No har eg begynt å gjere litt slike ting igjen, legg ho til.

Superlønnsam lidenskap
Ein titt på rekneskapen til Cecilie Skog As viser at lidenskapen også har gitt firmaet ei lønnsemd dei fleste berre kan drøyme om.

Dei siste tre åra har firmaet hatt ei omsetning på mellom 4 og 6 millionar, og eit resultat før skatt på 3,3 til 4 millionar. Resultata har gjort at selskapet har opparbeida seg ein eigenkapital på nær 16 millionar kroner.

Mykje av inntektene i firmaet kjem av prosentar frå sal av eige kleskolleksjon, ski og skistøvlar frå ulike merkevarer ho har jobba med.

– Ønsker å gjere Ålesund til ein betre studentby
Studentarrangementet måndag var det andre i ein serie der lokale aktørar har gått saman om å knyte studentane tettare til kvarandre – og samtidig vise kva regionen har å by på.

– Vi ønsker å gjere Ålesund til ein betre studentby ved å vere med å bygge regionen og skape gode møteplassar, fortel banksjef Andreas Ulvestad i Sparebanken Møre til Nett No.

Regionbanken er med å arrangere opplegget saman med Momentium, NTNU og Studentsamskipnaden Sit. Dei støttar også fleire av aktørane som var med på arrangementet, som turistforeininga, Raude Kors og Stikk Ut-ordninga.

– Ofte ein kritisk fase for studentane
Etter at friluftsliv var tema denne gongen, er det kultur som er i fokus i neste runde.

Ulvestad påpeiker at eit viktig mål er å motverke utanforskap.

– Tida etter at studiet har starta opp, er ofte ein kritisk fase for studentane. Dei som finner ein aktivitet å vere med på, har langt større sjansar for å trivast. Og vi håpar sjølvsagt at dei trivast så godt, at dei bli i regionen, legg han til.