Langvarig kamp om krillen

ANALYSE

Då Høgsterett i 2020 sette punktum for ein patentstrid mellom Kjell Inge Røkke-dominerte Aker Biomarine og Stig Remøys Rimfrost, hadde dei gått heile seks rundar i retten. 

Først om kva som var rett domstol å føre saka i, og deretter gjennom tingretten og lagmannsretten i Ålesund - før den kom til Høgsterett. 

Rimfrost vann saka, men no er dei to partane i open strid igjen. 

Rimfrost krev at Nærings- og Fiskeridepartementet gjer om på godkjenninga av salet av deler av Aker Biomarine si verksemd - Aker Qrill Company - til amerikanske American Industrial Partners. I realiteten er det no American Industrial Partners som kontrollerer krillkonsesjonane, og det er i strid med deltakarlova, meiner Rimfrost. 

Det er Aker Qrill Company ikkje samd i. Ein modell som er brukt og godkjent mange gangar før, seier selskapet om eigarskapen og kontrollen over selskapet.

Striden som vart avgjort i 2020 starta med at krillfiskereiarlaget Emerald Fisheries - med Stig Remøy som hovudeigar - blei slått konkurs i 2017. Aker Biomarine kjøpte buet, og meinte retten til produksjonsteknologien ombord i krilltrålaren var med på kjøpet, og ikkje tilhøyrde Stig Remøys selskap Rimfrost. Det fekk selskapet altså ikkje medhald i, men striden mellom dei to tok altså ikkje slutt med det.

Våren 2020 fekk Stig Remøy med seg mellom andre Sølvtrans-grunnleggar Roger Halsebakk som medeigar i ei ny krillsatsing. Medinvestorar var også bergensreiar Johan Odfjell og rogalendingen Jacob Hatteland. 

Eit nytt skip for krillfiske til over ein milliard kroner vart bestilt. Kongsberg Maritime sto for designet, Westcon skulle utruste skipet og få skroget bygd hos Tersan Shipyard i Tyrkia. 

– Dette er ein gledens dag. Vi har arbeidd i lang tid saman med norske fagmiljø for å utvikle teknologi som vil setje ein helt ny standard for krillfiske i Antarktis, både når det gjeld klimavenlegheit, berekraft og ressursutnytting, sa hovedeigar Stig Remøy i ei pressemelding. 

Den opphavleg planen var at skipet skulle vere ferdig i 2022. 

No er vi i 2025 og så langt har skipet sysselsett fleire advokatar enn fiskarar.

Det er strid mellom Rimfrost og Westcon, som har ei voldgiftsak gåande. Striden handlar mellom anna om ansvaret for at kontrakten med Tersan Shipyard vart kansellert og skroget til slutt vart seld til Aker Qrill Company, som vil bygge det om til eige bruk. 

Her er det også nokre ubesvarte spørsmål: Korleis kunne usemja mellom Rimfrost og Westcon bli så tilspissa at partane ikkje greidde å finne ei minneleg ordning? Når partane vart så usamde som dei blei, kvifor kunne ikkje Rimfrost-investorane kjøpt ut skroget og fabrikkanlegget til båten - og tatt ei runde i retten om pris og ansvar etterpå?

Det er óg ope strid mellom Aker Biomarine/Aker Qrill Company og Rimfrost både om salet av deler av verksemda i Aker Biomarine, og om retten til skroget som skulle bli Rimfrost sitt nye krillfartøy.

I første omgang ligg ballen hos fiskeri- og havminister Marianne Sivertsen Næss sitt departement. Dei skal avgjere om fiskeridirektør Frank Bakke-Jensen og byråkratane hans i Fiskeridirektoratet handla rett då Aker Biomarine fekk klarsignal for å selje deler av verksemda til American Industrial Partners. 

I eit innlegg i januar 2025, mellom anna i Nett No, skreiv styremedlem Tore Hopen at Fiskeridirektoratet brukte tre dagar på sakshandsaminga. Nett No har spurt Fiskeridirektoratet om det stemmer, men direktoratet vil ikkje svare.

«Vi kommenterer ikke på saken i sin helhet, dermed heller ikke på spørsmålet som angår detaljer eller fakta, av hensyn til saksbehandlingen. Dermed må du eventuelt komme tilbake til oss på en senere tidspunkt i saksbehandlingsprosessen. For øyeblikket er den hos Nærings- og fiskeridepartementet som nevnt», skriv Nadia Jdaini i direktoratet si kommunikasjonsavdeling.

Det blir neppe slutt på striden om Sivertsen Næss skulle konkludere med at Fiskeridirektoratet gjorde feil i spørsmålet om salet til American Industrial Partners - og i tillegg konkludere med at Aker Qrill Company ikkje får erververtillatelse for å overta skroget til det som opphavleg skulle bli ny båt til Rimfrost. 

Det vil truleg bety starten på ei rettssak det American Industrial Partners og/eller Aker Biomarine/Aker Qrill Company går til sak mot staten.

Skulle Sivertsen Næss konkludere motsett - til gunst for Aker Biomarine-sida, står det så mykje på spel for Rimfrost at også den sida truleg vil vurdere om den kan gå rettens veg.