Magrare for restaurantbransjen

Nett No-barometeret

Frå 2022 til 2023 auka inntektene til selskapa i Nett No si oversikt over restaurantbransjen på Nordvestlandet med over 12 prosent. Frå 2021 er veksten heile 33 prosent.

Problemet for bransjen samla sett er at lønsemda går den andre vegen.

I 2021 var resultat før skatt i prosent av driftsinntektene (resultatmargin) 4,8 prosent. Den fall i 2022 - og vidare til 2,5 prosent i 2023.

Av 37 selskap gjekk heile 16 med underskot i 2023. I 2022 var det 13, og i 2021 ni selskap som dreiv med tap.

Vekst for dei største
Det er imidlertid store skilnadar restaurantselskapa i mellom.

Inntektene til dei ti største, utgjorde 53 prosent av dei samla inntektene til selskapa i Nett No si oversikt. Og av dei ti største selskapa målt i driftsinntekt var det berre eitt - Bro i Ålesund - som gjekk i minus i 2023. Året før var det tre i minus.

Resultatmarginen for denne gruppa gjekk rett nok litt ned - frå 7,4 til 6,7 prosent - men ligg uansett godt over gjennomsnittet for heile bransjen på Nordvestlandet.

Blant dei ti største er det også fem selskap som har eit overskot før skatt på over ti prosent av driftsinntektene.

Av dei andre restaurantane er det berre to som har ei slik lønsemd, Havfruen i Måløy og Nonna Lina i Ålesund.

Tøft å vere liten
Av dei 15 selskapa med den lågaste driftsinntekta, gjekk berre fire i pluss i fjor.

I 2022 var det åtte.

Samla sett gjekk dei 15 minste selskapa med underskot - og det samla underskotet var større i 2023 enn i 2022.

Bransje i endring
I løpet av dei siste åra har først Apotekergata No. 5 og deretter Sjøbua forsvunne frå Nett No si oversikt. Restaurantane eksisterer, men er no ein del av Hotel Brosundet og rapporterer ikkje eigne tal.

Lystgaarden Bar & Restaurant er også ute. Selskapet dreiv Fumo Fusion & Bar i Kongens gate i Ålesund inntil den blei stengt. I år har den indiske restauranten Namaste opna i lokalet.

Les nokre av årets resultatsaker frå Nett No: