Først frå maritim student til doktor

Marie Haugli-Sandvik forsvarte førre veke si avhandling om korleis dekksoffiserar møter it- og cyber-risiko om bord på skip.

Som doktor i ingeniørvitskap vart ho også den første har gått den maritime utdanningsvegen frå bachelorstudent i nautikk, til doktor ved NTNU i Ålesund, ifølgje ei pressemelding tysdag.

I doktoravhandlinga har Haugli-Sandvik har fordjupa seg i maritim cybersikkerheit og menneskelege faktorar.

Bør jobbe meir med cybertrugslar
Ho fortel til NETT NO at eitt av hovudfunna i arbeide var at det var ein skilnad på korleis offiserane sitt forhold til dei operasjonelle systema – som dei brukar til å navigere etter, og it-systema dei jobbar med.

– Styrmenn er gjerne meir opptekne av teknologien som styrer dei fysiske tinga rundt dei, og ikkje så opptekne av it-systema, seier ho.

Haugli-Sandvik har sjølv arbeidserfaring frå sjøen og meiner reiarlag både bør legge betre til rette for bruken og utføre meir opplæring i desse systema, for å senke risikoen for uønskte hendingar.

– Det blir fokusert svært mykje på fysiske trugslar mot skip, som brann eller bombetrugslar. Framover bør ein i større grad jobbe med cybertrugslar som kan råke teknologien, legg ho til.

Skal undervise og forske
Haugli-Sandvik leverte i 2016 bacheloroppgåva i nautikk, som ein av dei første ved det nyfusjonerte NTNU i Ålesund. Tre år seinare vart masteroppgåva levert, innan emnet leiing av krevjande maritime operasjonar.

No er ho tilsett som førsteamanuensis ved Institutt for informasjonstryggleik og kommunikasjonsteknologi.

– Framover skal eg undervise alle ingeniørstudentane våre og forske vidare på cyber-sikkerheit, fortel ho.

Avhandlinga heiter Cyber Risk Perception in Offshore Operations: An Exploratory Study of Deck Officers' Perceptions of Cyber Risks in Norwegian Shipping Companies, og blir publisert på NTNU Open i løpet av kort tid.