Legg ut på seglas for å fjerne formuesskatten

Aksjon for Norsk Eierskap inviterer i år til aksjonsseglas langs kysten. Målet er å engasjere til opprør mot det dei kallar ein «næringsfiendtleg skattepolitikk».

Fredag ettermiddag kastar Gamle Havstein loss frå Brosundet i Ålesund og setter kursen sørover. Då blir det også invitert til ei orientering om aksjonen og dei vidare planane.

– Eit flytande folkemøte
Aksjon for Norsk Eierskap blei starta som ein reaksjon på Støre-regjeringa si skjerping av mellom anna formuesskatt og utbytteskatt dei siste åra.

– Den 20 meter lange båten blir eit flytande folkemøte der innbyggjarar, politikarar og næringsliv treffast for å lage ein betre skattepolitikk for norske gründerar og eigarar. Å fjerne skatt på arbeidande kapital er aksjonens aller viktigaste oppgåve, heiter det i invitasjonen.

Arendalsuka er første stopp
Roger Hofseth er styreleiar og initiativtakar til aksjonen saman med Knut Flakk.

Han gler seg til å møte interesserte undervegs på seglases som har Arendalsuka i midten av august som første stopp. Deretter går turen vidare til Oslofjorden.

– Frå aksjonsbåten skal vi lytte til verdiskaparane langs kysten og vere kystens stemme, heiter i meldinga frå aksjonistane.

Krass kritikk og søksmål
Kritikken frå norske bedriftseigarar har vore krass, etter ei dobling av eigarskattane på to år.

Aksjonistane påpeiker mellom anna at utanlandske eigarar slepp å betale formuesskatten, og at den difor er urettvis.

Det har fått Ørsta-gründer Lars Oscar Øvstegård til å gå til søksmål mot staten. Med på laget har han mellom anna fått med seg jussprofessor Mads Andenæs, og det er venta at søksmålet blir teke ut formelt på seinsommaren eller tidleg i haust.