Meiner straumkundane er budsjettvinnarane

(NPK-NTB-Edvard Stenersen): Straumen blir billigare og elbilane dyrare, medan gode til barnefamiliar kan bli overskygde av kutt, meiner forbrukarøkonomar.

– På vinnarsida er det kanskje noko så kjedeleg som alle norske straumkundar, seier forbrukarøkonom Magne Gundersen i SpareBank 1 til NTB om kven som kjem best ut av statsbudsjettet.

– Det er fordi me får noregspris heile neste år, i motsetning til i år. Viss straumprisane er som dei har vore dei siste åra, så er det jo ein del tusenlappar å spara, seier han.

Gundersen peikar på at også elavgifta er sett ned.

– Her snakkar me om at folk med ein einebustad og folk med straumforbruk tilsvarande ein einebustad fort kan få meir enn 4000 kroner i lågare straum- og nettutgifter, seier Gundersen.

Også forbrukarøkonom Cecilie Tvetenstrand i Storebrand og «Luksusfella» peikar på billigare straum.

– På elavgifta får du ein reduksjon. Også kjem det an på om du har straumstøtte eller noregspris, men her er det gode moglegheiter til å få redusert straumrekninga, seier ho.

Spår fleire gode år framover
Regjeringa legg opp til ein lønnsvekst på 4 prosent og ein prisvekst på 2,2 prosent.

– Det betyr jo at dei fleste kjem til å få ganske mykje betre råd til neste år, seier Tvetenstrand.

– Og det er jo det med føreseielegheit og at me får behalde jobbane våre, som er det viktigaste for dei fleste, poengterer ho.

Det kjem truleg også til å komma litt fleire ting som vil gagna lommeboka framover, trur Tvetenstrand.

– Det som eigentleg slo meg mest i budsjettet, er at her er det mange kort som regjeringa held til brystet til forhandlingsrunden, seier ho.

– Eg trur ikkje dette her blir det endelege budsjettet, for det stod ingenting om tannhelse, auka kollektivstøtte, auka bustøtte eller Husbanken, seier Tvetenstrand vidare.

– Dei som budsjettet er viktigast for, er jo dei som har det tøft, som treng støtteordningar og velferdsstaten. Og det er gjerne dei som får litt meir i budsjettet, poengterer ho. Ho peikar på tiltak retta mot einslege, tannhelse og SFO som moglegheiter.

Studiegjeld og dyrare elbilar
Regjeringa foreslår å senka momsfritaket på elbilar frå 500.000 kroner til 300.000, noko som inneber at ein elbil til 500.000 kroner, vil kosta 50.000 kroner meir.

Tiltaket er møtt med harme frå Norsk elbilforening.

– Om du har bestilt deg ein dyr elbil som du får levering på i februar, til til dømes 700.000 kroner, så får du ei rekning på 100.000 kroner ekstra om dei får gjennomslag. Det kan bli ei kjip overrasking for mange på nyåret, seier Tvetenstrand.

Gundersen peikar likevel på ei mogleg oppside. Han trur at prisane på brukte elbilar kjem til å auka, noko også Tvetenstrand trur.

– Når nybilprisen stig, så vil bruktmarknaden følgja med, seier Gundersen. Han seier det «godt kan vera snakk om» titusenvis av kroner i auka salspris på bruktbilane.

– Ei tapargruppe er kanskje dei som trudde dei skulle få avskrive masse studielån i åra framover og har flytta til ein kommune som no plutseleg er teken ut av dei sonene som skal få ettergiving av studielån, seier Gundersen.

– Det er snakk om store beløp. Men det gjeld nok veldig få, det var ei lita gruppe, seier han.

Både pluss og minus for barnefamiliane
– Eigentleg kunne ein vore freista til å seia at vinnarane er barnefamiliane, seier Gundersen.

– Ein fører vidare den låge barnehageprisen, og det betyr at neste år vil ein familie som har barn i barnehage i år og har barn i barnehage neste år, få 4800 kroner i lågare barnehageutgifter, seier han.

Samtidig blir foreldrefrådraget redusert frå 25.000 til 15.000 for første barn, medan barnetrygda står stille.

– Det er litt sånn at ein vinn på den eine sida, men så taper ein på den andre. Staten gir med den eine handa, men ho tek jammen igjen med den andre, seier Gundersen.

Regjeringa foreslår også å kutta eingongsstønaden frå 92.648 til 60.000 kroner.

– Det er jo mindre støtte til foreldre som ikkje har rett til foreldrepengar. Til dømes studentar eller unge utan inntekt. Det synest eg er eit litt merkeleg grep av regjeringa, all den tid me treng og ønskjer fleire barn, seier Tvetenstrand.

– For dei som er i den situasjonen at dei ikkje har rett på foreldrepengar, så kan det utgjera ganske mykje. Det er jo trass alt ein tredel som blir kutta bort, seier ho.

(©NPK)