Må ha hjelp av kreditorane

Golden Energy Offshore Services har dei fire PSV-ane Energy Scout, Energy Swan, Energy Empress og Energy Duchess. I første halvår i år var tre av skipa stort sett i opplag, noko som gjorde at det vart magert med inntekter.

Dette går fram av halvårsrekneskapen, der flåten segla inn 23,5 millionar kroner, og resultatet før skatt vart minus 22,1 millionar kroner.

(saka held fram etter tabellen)

Vil selje skip
No treng selskapet hjelp med kreditorane for å styrke seg finansielt. I ei børsmelding vert det opplyst at ein er i dialog med kreditorane, der ein forventar å få til ein avtale der deler av kortsiktig gjeld vert konvertert til langsiktig sikra gjeld. Den kortsiktige gjelda er på 363 millionar kroner.

I tillegg er PSV-skipet Energy Scout til sals, eit skip selskapet overtok i mai 2014. Men sjølv om selskapet har fått bod på skipet, vert det sagt at det er forhold utanfor bodgivar sin kontroll som gjer at det kanskje likevel ikkje vert noko av salet. Dermed kan ei løysing vere å drive skipet vidare.

Styret skriv at første halvår vart ekstremt krevjande, men at det vart betring i slutten av halvåret.

Tre av fire skip er no tilbake i arbeid, og Energy Swan har fått langtidskontrakt til 1. november 2022.

Lav børsverdi
Golden Energy Offshore Services har 482 aksjonærar.

Selskapet er no prisa til 40 millionar kroner på Oslo Børs.

Kursen har siste månaden stige med 14,3 prosent etter at det vart kjend at selskapet har fått fleire nye kontraktar.

På årsbasis er derimot kursen ned 12,5 prosent.