Ny supervekst for nettbutikk

Etter fleire år med kraftig auke, gjorde omsetninga eit nytt hopp for netthandelbutikken Sparelys på Åheim i fjor.

Ei omsetning på meir enn 125 millionar kroner er ny rekord med god margin, og svarar til ei auke i inntektene på kring 40 prosent samanlikna med året før.

- Vi har halde fram trenden med å ta nye marknadsandelar, fortel styreleiar Inge Nordaune Hasz til NETT NO.

Vaks kraftig under pandemien
Nettbutikken sender varer til store delar av landet frå lageret og kundemottaket i Vanylven. Inntektene til Sparelys vaks kraftig under pandemien – og har halde fram sidan.

Etter at dei omsette for knappe 50 millionar i 2019, auka inntektene til 77 og 90 millionar i 2020 og 2021, før rekordåret i fjor.

Hasz fortel at dei har auka «over heile linja», men at det særleg er ulike smarte løysingar til hyttemarknaden har gitt dei høgt volum.

(saka held fram under)

Aukar kostnadene – svakare lønnsemd
Etter ei ekstraordinært lønnsamt år i 2021, blei marginane litt mindre i fjor med eit overskot før skatt på knappe 9,8 millionar.

- Kostnadene har auka både nå det gjeld valuta og frakt, som har gjort at fortenesta har dabba litt av, seier Hasz.

Svak krone gjer at innkjøpa til nettbutikken som i stor grad skjer i dollar og euro, blir dyrare.

- Det er lenge sidan kronekursen var gunstig for vår del, legg han til.

I tillegg har dei nytta meir pengar på marknadsføring i sosiale media, ifølgje årsrapporten.

Er oppe i 27 tilsette
Rimeleg lokale og låg arbeidsgivaravgift, er mellom fordelane ved å drive nettbutikk på Åheim. Bedrifta har 27 tilsette fordelt på 18 årsverk.

Inge Nordaune Hasz og Petter André Morseth eig halvparten kvar av selskapet som blei starta i 2010.

Eigenkapitalen var ved utløpet av 2022 på knappe 48 millionar og den langsiktige gjelda på 11,9 millionar kroner.