Nye prisanslag for flytande havvind

(NPK-NTB-Marius Helge Larsen): Det vil koste 1,34 kroner/kWh å produsere flytande havvind i Nordsjøen, ifølgje nye anslag. Statsstøtta kan bli på opp mot 36 milliardar kroner for eitt anlegg.

– Sjansane for at dette er starten på ein ny industriepoke for Noreg er stor, det er det ingen tvil om, seier energiminister Terje Aasland (Ap) til NTB.

Han blir ikkje skremd av dei ferske anslaga som analyseselskapet Afry har laga for Noregs vassdrags- og energidirektorat (NVE).

Tala er del av grunnlaget for regjeringsforslaget til ei støtteordning for flytande havvind, som fredag blir send ut på høyring.

– Eg trur flytande havvind blir lønnsamt. Det kjem til å vere viktig for industrien for Noreg framover. Viss vi lykkast på heimebane, kjem vi til å lykkast ute i verda, seier Aasland.

Milliardsubsidiar
Dei nye anslaga gjeld for områda Vestavind B og Vestavind F, som også inkluderer det aller første feltet for flytande havvind som skal lysast ut, nemleg Utsira Nord.

Ein går ut frå at staten må bidra med subsidiar på mellom 12 og 36,5 milliardar kroner for å byggje ut eit flytande havvindanlegg som produserer 506 MW straum i områda.

Anslaga er usikre, og regjeringa legg til grunn eit basiscenario der det vil vere behov for støtte på 24,7 milliardar kroner.

– Selskapa må konkurrere på teknologi og løysingar, både når det gjeld pris, kvalitet, miljø og klima. Vi meiner at ein modell der det blir gjennomført ein konkurranse om statsstøtte etter ein modningsfase vil bidra best til utviklinga av flytande havvind og vil leggje til rette for minst mogleg statsstøtte, seier Aasland.

Regjeringa har tidlegare sagt at dei vil byggje ut 1500 MW i Utsira Nord.

Legg ein baisscenarioet til grunn, vil i så fall den totale prislappen ende på nærare 75 milliardar kroner.

Aasland trur kostnadene skal ned
Straumkostnaden samanlagt over heile levetida til anlegget (LCOE) blir berekna til 1,34 kroner per kilowattime. NVEs tidlegare anslag for flytande anslag har vore på 1,17 kroner/kWh.

Til samanlikning kostar vasskraft rundt 40 øre per kWh.

Energiministeren seier at dette er nybrotsarbeid og at det aldri er bygd ut liknande prosjekt.

– Eg trur vi kan få kostnadene mykje ned i løpet av kort tid, seier han.

All krafta går til Noreg
Eit mål med satsinga er å leggje til rette for at norsk industri, og spesielt leverandørindustrien, får nye bein å stå på.

– Vi ønskjer å vere tidleg ute med å gå inn for ein teknologi verda kjem til å spørje etter, seier Aasland.

Han er tydeleg engasjert, og legg ikkje skjul på at han verkeleg brenn for flytande havvind.

– Dette er kjempemoro å halde på med, veldig spennande, seier han.

– Kvar einaste produserte kilowattime frå dette området, vil gå inn i det norske kraftsystemet. Det gir oss meir fornybar energi og høve til å kutte klimagassutslepp.

PS! Parallelt med den flytande havvinden, arbeider regjeringa med havvindmøller som står festa til havbotnen. Det første prosjektet, Sørlege Nordsjø II, vart tildelt i mars.

(©NPK)