Regjeringa la fram plan for havvind

(NPK-NTB-NETT.NO): Regjeringas havvindplanar vart lansert på ein pressekonferanse onsdag med statsminister Jonas Gahr Støre (Ap) til stades.

Regjeringa legg no til rette for å realisere første fase av havvind frå Sørlige Nordsjø II.

– Dette er ei løysing som aukar krafttilførselen til Sør-Noreg. Regjeringa sitt mål er å legge til rette for at Noreg har tilgang på rikeleg med fornybar og rimeleg kraft, slik at dette også i framtida er eit fortrinn for norsk industri og bidreg til verdiskaping og sysselsetting i heile landet, seier statsminister Jonas Gahr Støre.

Også finansminister Trygve Slagsvold Vedum, olje- og energiminister Marte Mjøs Persen og næringsminister Jan Christian Vestre deltok.

Sjå pressekonferansen (ekstern lenke)

Første fase av Sørlige Nordsjø II vil vere på 1500 MW. Det svarer til om lag 7 TWh i året, tilsvarande kraftforbruket til 460 000 hushald.

Auksjonsmodell
Det blir lagt opp til at auksjon skal vere hovudmodell for tildeling av areal til havs.

Regjeringa vil no gå vidare med regelverksendringane om auksjonsløysing og arealtildelingsprosess som var på høyring sommaren 2021, og vil i løpet av våren fremje ein lovproposisjon for Stortinget med endringar i havenergilova og fastsette endringar i havenergilovforskrifta.

Vil opne fleire områder
Den langsiktige satsinga på havvind er avhengig av tilgang på areal. Regjeringa ønskjer å skape forutsigbarheit for næringa med å opne for fleire prosjekt etter Sørlige Nordsjø II og Utsira Nord.

Olje- og energidepartementet vil gje NVE i oppdrag å identifisere nye område for fornybar energiproduksjon til havs basert på innspel frå ei direktoratsgruppe, og å utarbeide forslag til konsekvensutgreiingsprogram.

Dette arbeidet vil ta 9-12 månader. Deretter må konsekvensutgreiinga gjennomførast før nye område kan opnast.

Droppar hybridkablar
På førehand fekk NTB opplyst at satsinga berre vil innehalde kablar som går til Noreg. Avgjerda om utanlandssamband blir utsett, ifølgje Aftenposten og fleire andre medium.

I staden vil regjeringa setje ned ei form for arbeidsgruppe som skal sjå nærare på spørsmålet, ifølgje opplysningar Dagens Næringsliv har fått.

Les pressemeldinga frå regjeringa her

Etter det NTB erfarer vil regjeringa no setje i gang med eit havvindprosjekt som ikkje omfattar omdiskuterte hybridkablar, men i staden med eit såkalla radielt samband, det vil seie berre knytte til Noreg.

Det er førebels to havområde som er aktuelle for utbygging med vindturbinar. Utsira Nord ligg like utanfor Haugesund. Sørlege Nordsjø 2 ligg lenger sør og vil bli meir samfunnsøkonomisk lønnsamt dersom det blir knytt til utlandet med ein hybridkabel, ifølgje Statnett.

Les meir om vindkraft og havvind under: