Rekordresultat i Tussa Installasjon

Både salsinntekter og resultat før skatt veks for Tussa Installasjon i 2022. Selskapet er eit eit heileigd dotterselskap i Tussa-konsernet, og driv med levering og installasjon av elektrotenester og -utstyr.

Resultat før skatt enda på rett under 11 millionar, med ein resultatmargin på 6,2 prosent.

Utvidar nedslagsfeltet
Tussa Installasjon er ei av dei største elektrikarbedriftene i regionen, og har etter kvart etablert avdelingar på ein rekke ulike lokasjonar. Selskapet sysselsette i snitt 101 årsverk i 2022.

I desember 2021 kjøpte Tussa Installasjon elektrikarbedrifta Stryn Elektro, og i juni 2023 melder selskapet om at samanslåinga er fullført.

- I 2022 auka ordreinngangen med 13 prosent. Auke i omsetninga skuldast stor aktivitet i prosjektmarknaden, og kjøp av Stryn Elektro. Året 2023 vil vere prega av god aktivitet innafor både prosjekt- og servicemarknaden, skriv Tussa i årsmeldinga for 2022.

Satsar på solceller
Energieffektiviseringstiltak og eigenprodusert straum er i vinden som aldri før. Dei siste åra har det vore mykje utvikling på elektrofronten, og solceller har i større grad enn tidlegare blitt eit framveksande tenesteområde for Tussa Installasjon.

I 2022 leverte dei solceller til ei rekke større og mindre prosjekt, og installerte mellom anna solceller på taket til Volda Mat. Anlegget består av 204 panel, og kan produsere om lag 52.000 kWh i året.

- Forretningsområdet er prega av stor teknologisk utvikling, mellom anna innan ulike automasjons- og styringssystem. Selskapet opplever også at interessa for miljøvenlege løysningar, som til dømes solceller, aukar i regionen vår, skriv morselskapet Tussa i årsrapporten om utviklinga i Tussa Installasjon.