Rekordtjukk ordrebok ved Stranda-fabrikken

Etter at koronaen sette møbelbransjen på pause i fjor vår, kan Slettvoll-sjef Bjørn-Helge Vik konstatere at pandemien har bidrege til det beste resultatet til møbelprodusenten nokon gong.

Overskot før skatt er tredobla frå året før, frå 11 til 34,5 millionar(sjå tabell under).

– Vi har kome godt ut av «nestingtrenden» der kundane har konsentrert seg om hus og heim, og alt som er nært. Ein skal ha litt flaks i business og den trenden har slått ut i vår favør, fortel Vik fornøgd til NETT NO.

Rekordreserve på Stranda
Slettvoll-konsernet har hovudkontor i fabrikken på Stranda, medan sal, marknadsføring og andre støttefunksjonar er fordelt mellom Stranda og Ålesund. Til saman har møbelkonsernet 85 tilsette i arbeid på Sunnmøre.

Den høge etterspurnaden – kombinert med at Slettvoll har henta heim meir produksjon – betyr auka bemanning på Stranda-fabrikken.

– Vi har rekordreserve ved fabrikken på Stranda og har auka bemanninga her, fortel Vik.

(saka held fram under)

– På jakt etter fleire tilsette
I dag jobbar 45 tilsette på Stranda-fabrikken og arbeidet dreiar seg i stor grad om møbelhandverk.

– Vi er framleis på jakt etter fleire tilsette. Produksjonen effektiv og moderne, men i liten grad robotisert og det er ingen samlebandsproduksjon. Vi jobbar med høgkvalitetsmøblar og treng kvalifisert arbeidskraft, påpeiker Vik.

Å få tak på fagfolk er ikkje alltid enkelt, men Slettvoll-sjefen ser ingen grunn til å svartmale tilgangen på arbeidskraft. Samtidig opplever dei at tilsette blir i jobben lenge.

– Vi håpar det er eit teikn på at dei trivst og at Slettvoll er en god arbeidsplass, legg Vik til.

God inntening ved Ålesund-butikken
Ålesund er mellom butikkane som trekk opp resultatet til Slettvoll-konsernet. Med eit driftsresultat på 2,3 millionar frå ein omsetning på meir enn 19 millionar, har butikken for første gong ein driftsmargin på meir enn ti prosent.

– Det viser kvar det gode resultatet til konsernet kjem frå. Vi har jobba hardt dette året, og klart å manøvrere gjennom koronaperioden på ein god måte. Samtidig har butikkmedarbeidarane vore fantastisk flinke til å skape trygge handleopplevingar, og følgje smittevernreglane frå styresmaktene, fortel Slettvoll-sjefen.

Slettvoll har til saman 19 butikkar rundt om i Norge, i tillegg til København, Stockholm, Gøteborg og Malmø.

Avhengig av klynga rundt seg
Slettvoll-sjefen er tydeleg på viktigheita av møbelklynga på Nordvestlandet, som har tyngdepunkt Sykkylven og Stranda.

– Vi er heilt avhengige av kompetansenivået som vi har på Stranda, men også hos alle underleverandørane rundt oss. Det er utruleg viktig å ha ein møbelindustri på Sunnmøre som gjer det godt, og vi heiar på alle som produserer rundt oss, seier Vik.