Rimfrost vann over DNB i lagmannsretten

Hordaland tingrett bestemte i januar i år at DNB  må legge fram all korrespondanse banken har hatt med Westcon i samband med krilltrålaren som verftet skulle levere for Rimfrost. 

Det var Rimfrost som hadde kravd innsyn, for å kunne legge fram korrespondansen som bevis i ei voldgiftsak om kanselleringsoppgjeret etter at Westcon heva kontrakten.

DNB anka kjennelsen frå Hordaland tingrett til Gulating lagmannsrett, som i hovudsak er samd med tingretten og har gitt Rimfrost medhald.

«Rimfrost har nådd frem ned sin anførsel om at kredittsakene ikke inneholder forretningshemmeligheter og må legges frem usladdet», heiter det i kjennelsen frå lagmannsretten. 

Retten meiner Rimfrost «i det vesentlige» har vunne saka, og at DNB difor må dekkje Rimfrost sine sakskostnadar på 530.000 kroner.

Kjennelsen kan ankast og ankefristen er ei veke.

Nøgd med dommen
Stig Remøy i Rimfrost er nøgd med utfallet og seier i ein epost:

«Kjennelsen fra lagmannsretten er som forventet. Den slår tydelig fast at dokumenter som DnB over lang tid og uten rettslig grunnlag har tilbakeholdt, nå skal fremlegges for Rimfrost og voldgiftsretten. Vi forventer at dokumentasjonen vil vise det vi hele tiden har vært sikre på, nemlig at det var andre grunner til kontraktshevingen enn det Westcon har hevdet».

Han meiner motparten har trenert saka. 

«Rimfrost har opplevd hele prosessen som trenering hvor eneste formål har vært å unnlate påkrevd innsyn. En trenering som, slik saken nå står, kun har tjent til fordel for Rimfrost sin konkurrent, Aker Qrill. Etter to så tydelige kjennelser legger vil til grunn og forventer at DNB som en profesjonell aktør nå vil følge rettens klare pålegg og dermed bidra til at saken nå får den nødvendige fremdrift.»

Skulle fiske frå  2022
Krilltrålaren til Rimfrost skulle opphavleg på fiske i farvatna rundt Antarktis allereie i 2022. 

Skroget og mykje av utrustninga skulle gjerast ferdig hos Tersan Shipyard i Tyrkia, før fabrikken som skulle prosessere krillfangsten skulle settast inn av Westcon i Noreg.

I staden blei det forseinkingar, full strid mellom Westcon og Rimfrost om vilkår og betaling, kansellert kontrakt og deretter strid rundt voldgiftsaka som skal fastsette oppgjeret etter den kansellerte kontrakten. 

I vinter kjøpte Rimfrostkonkurrenten Aker Qrill Company det nesten ferdige fartøyet, som no er under ombygging. 

Rimfrost har varsla erstatningskrav mot både Westcon-selskapa som er kontraktsmotpart, og styret i dei to selskapa. Kravet skal mellom anna dekke tapsavsetninga i 2024-rekneskapen.

Strid om bevis
Ei voldgiftsak er ei privat rettsaksliknande tvisteløysingmetode, som ikkje er offentleg. Det er en måte som partane på førehand avtalar for å avgjere eventuelle konfliktar på, til dømes i ei skipsbyggingskontrakt. 

Men partane strides om kva bevis som skal leggast fram i voldgiftsaka. Det har forseinka voldgiftsaka. 

Rimfrost har gått til sak både mot Westcon-selskap og DnB for å få fram informasjonen om kva som skjedde i samband med kanselleringa som Rimfrost meiner må på bordet.