Tek over roret i Havila Kystruten

Havila Kystruten konstituerer Arne Johan Dale som administrerande direktør, opplyser reiarlaget i ei pressemelding fredag.

Dale vert konstituert frå måndag 14. juni og fram til 9. august då Bent Martini tek til i stillinga.

Arne Johan Dale har vore finansdirektør i Havila Shipping frå 2008 og i Havila-gruppa frå april i år. Han kom til Havila Shipping frå stilling som økonomisjef i Glitnir Bank og var tidleg på 1990-talet sentral i etableringa av KredittBanken i Ålesund.

Myrvoll til Sølvtrans
Avtroppande kystruten-direktør Arild Myrvoll skal starte som finansdirektør i Sølvtrans-reiarlaget.

Han vert fristilt frå måndag 14 juni, men vil være tilgjengeleg for selskapet ei tid framover.

Myrvoll byrja i Havila Kystruten i 2018 og kom frå jobben som direktør i offshoreselskapet Rem Maritime.

(saka held fram under)

Karantene frå Hurtigruten
Bent Martini er ny administrerande direktør i Havila Kystruten. Martini gjekk i fjor haust av som driftsdirektør i Hurtigruten etter smitteskandalen der 71 personar om bord i MS Roald Amundsen fekk påvist koronasmitte.

Martini er pålagt karantene frå tidlegare arbeidsgivar, og startar hos Havila Kystruten 9. august.

Han er busett i Asker og skal vekependle til Fosnavåg og hovudkontoret til Havila Kystruten.